मुटुरोग विशेषज्ञ डा कोजुको ‘मुटुको कथा’ सार्वजनिक

काठमाडौँ । मुटुरोग विशेषज्ञ प्रा.डा.राजेन्द्र कोजुको ‘मुटुको कथा’ शीर्षकको कृति सार्वजनिक भएको छ । काठमाडौंको कमलादीस्थित
नेपाल प्रज्ञाप्रतिष्ठानको डबलीमा आज आयोजित एक समारोहमा प्रा.डा.भगवान कोइराला प्रा.डा.सन्दुक रुइत,धुलिखेल अस्पतालका संस्थापक प्रा.डा.रामकण्ठ मकाजु, मुटुरोग विशेषज्ञ डा स्मृति शाक्य, हास्यकलाकार हरिबंश आचार्य र लेखक कोजुले लोकार्पण गर्नुभयको हो ।

बुक हिलले प्रकाशन गरेको उक्त कृतिमा मुटुको कथा, नूनको आत्मकथा,हत्तेरिक्ता औषधि नै छुट्यो,फेरिएको जीवन शैली, बा छाति त दुखेको छैन नि ? रक्सी समातेपछि र छाडेपछि, स्वस्थ जीवन र प्रार्थनासहित ४१ शीर्षकमा अनुभव, अनुभूति र घटनासम्बन्धी विषयबस्तु समेटिएका छन् ।

कृति लोकार्पण समारोहमा वरिष्ठ नेत्ररोग विशेषज्ञ प्रा.डा.रुइतले तुलनात्मकरुपमा नेपालको स्वास्थ्य क्षेत्र राम्रो रहेको र त्यसमा चिकित्सकहरुले व्यावसायिक धर्म तथा बिरामीप्रति करुणा व्यक्त गर्न सकेमा अझ प्रभावकारी हुने धारणा राख्नुभयो ।

त्यस्तै वरिष्ठ मुटुरोग विशेषज्ञ प्रा.डा.कोइरालाले समाज रुपान्तरणका लागि किताब लेखन र अध्ययनको प्रभाव लामोसमयसम्म रहने उल्लेख गर्दै हामीले व्यतित गरेको जीवनशैली र खानपिनमा सामान्य सुधार गर्न सके राम्रो स्वास्थ्यलाभ लिन सकिने अनुभव सुनाउनुभयो । उहाँले भन्नुभयो, “मैले बिरामीलाई सधैँ भन्दै आएको छु, गर्न नहुने भनेको चुरोट नखाने, गर्नैपर्ने भनेको व्यायाम रहेको छ ।”

कार्यक्रममा प्रा.डा.मकाजुले पुस्तक अध्ययनबाट धेरै ज्ञान प्राप्त हुने भएकाले मुटुको कथासम्बन्धी पुस्तकले अध्ययनका लागि थप प्रेरणा प्रदान गर्ने धारणा राख्नुभयो ।

हास्यकलाकार आचार्यले पुस्तकलाई आफूले सबैभन्दा नजिक सिरानीमा राख्ने साथीका रुपमा लिने गरेको हुँदा जन्मोत्सवलगायतका अवसरमा उपहारका रुपमा पुस्तक दिँदा उपयुक्त हुने धारणा राख्नुभयो । मुटुरोग विशेषज्ञ डा.शाक्यले मुटुको कथासम्बन्धी कृतिमा स्रष्टाले स्वास्थ क्षेत्रमा काम गर्दाको आफ्नो कथा, व्यथा, वास्तविकता, भावनालगायतका विषयबस्तु केही कविता र केही निबन्ध शैलीमा प्रस्तुत गरेको धारणा व्यक्त गर्नु भएको थियो।

मुटुरोग विशेषज्ञ तथा कृतिका लेखक कोजुले आफूले विभिन्न पत्रपत्रिकामा विभिन्न समय कालखण्डमा लेखिएका लेखहरुबारे उपचार गर्न आउने बिरामी र चिनेका व्यक्तिबाट प्राप्त गरेको माया र गर्विलो
प्रतिक्रियाबाट प्रभावित भई पुस्तक लेख्ने जमर्काे गरेको बताउनुभयो ।

लेखक प्रा.डा.कोजु आफ्नो जीवनको ४० वर्ष चिकित्सासम्बन्धी ज्ञान हासिल गर्ने सिलसिला र करिब २३ वर्ष मुटुरोग विशेषज्ञ भएर उपचारमा संलग्न हुँदा देखेका, भोगेका विषयबस्तुलाई सरल तरिकाले सर्वसाधारणसम्म पु¥याउन कथा, निबन्ध र स्मरण समेटेर पुस्तक प्रकाशन गरेको धारणा राख्नु भयको थियो।
लेखक प्रा.डा.कोजुले स्वास्थ्य क्षेत्रको संस्थागत र विधागत विकाशमा महत्त्वपूर्ण योगदान पुर्याउनु भयको छ।