वीरगंजमा अवैध रुपमा सञ्चालित तीन वटा स्वास्थ्य संस्था सिलबन्दी

वीरगंज । वीरगंज महानगरपालिका वडा नम्बर ४ बिर्तामा स्वीकृति बिना नै अवैध रुपमा सञ्चालनमा रहेका तीन वटा स्वास्थ्य संस्थालाई सिलबन्दी गरिएको छ ।

वीरगंज महानगरपालिकाद्वारा गठित स्वास्थ्य संस्था दर्ता, अनुमति तथा नवीकरण समितिको नेतृत्वमा गएको अनुगमन टोलीले स्वीकृति बिना सञ्चालनमा रहेका तीन वटा स्वास्थ्य संस्थामा सिलबन्दी गरेको हो ।

टोलीले चित्रांस पोली हेल्थ क्लिनिक, त्यसै अन्तर्गत रहेको प्याथोलोजी ल्याब र श्री गणेश डाइग्नोस्टिक सेन्टर महानगरपालिकाबाट स्वीकृति बिना अवैध रुपमा सञ्चालन गरिएको भेटेपछि सिलबन्दी गरेको समितिका सदस्य जयप्रकाश महतोले जानकारी दिनुभयो ।

तीन वटै स्वास्थ्य संस्था स्वीकृति बेगर सञ्चालन हुनुका साथै प्याथोलोजी ल्याबहरूले म्याद नाघेका केमिकल तथा औषधी प्रयोग गरेर रिपोर्ट तयार गर्ने गरेको भेटिएको समेत महतोले बताउनुभयो । महानगरपालिकाले गएको एक सातादेखि वीरगंजमा सञ्चालित प्याथोलोजी तथा क्लिनिकहरूको अनुगमन गर्दै आएको वीरगंज महानगरपालिकाका स्वास्थ्य शाखा प्रमुख रितेश जयसवालले जानकारी दिनुभयो ।

अवैध रुपमा सञ्चालित ३ वटै स्वास्थ्य संस्थालाई आज जिल्ला प्रशासन कार्यालय, वीरगंज महानगरपालिका र प्रहरीको उपस्थितिमा लाहाछाप लगाएर सिलबन्दी गरिएको जयसवालले बताउनुभयो ।

यसैगरी टोलीले अनुगमनका क्रममा तराई डाइग्नोस्टिक, शुभम क्लिनिक र वीरगंज डेन्टल क्लिनिक एण्ड इम्प्लान्ट सेन्टर मापदण्ड विपरीत सञ्चालनमा रहेको भेटिएकाले उनीहरुलाई तत्काल बन्द गर्न र मापदण्ड पुरा गरेर मात्रै सञ्चालन गर्न चेतावनी दिइएको स्वास्थ्य शाखा प्रमुख जयसवालले जानकारी दिनुभयो ।