वीरगञ्ज । पर्साको वीरगञ्ज महानगरपालिकाले नगरक्षेत्रका बर्थिङ सेन्टर (प्रसूति सेवा केन्द्र)बाट विशेषज्ञ डाक्टरसहितको बहिरंग सेवा सञ्चालन गर्ने तयारी गरेको छ । सबै वडाका जनतालाई गाउँबस्तीमै विशेषज्ञ चिकित्सकसहितको स्वास्थ्य सेवा पुर्याउन ‘मेयर घरदैलो स्वास्थ्य शिविर कार्यक्रम’ सञ्चालन गर्दै आएको महानगरपालिकाले कार्यक्रमलाई थप प्रभावकारी र दिगोपनका लागि बहिरंग सेवा सञ्चालन गर्ने तयारी गरेको हो ।
कार्यक्रमलाई दीर्घकालीन रूपमा सञ्चालन गर्न बर्थिङ सेन्टरमै गुणस्तरीय स्वास्थ्य सेवा उपलब्ध गराउने भएको वीरगञ्ज महानगरपालिकाका स्वास्थ्य तथा सामाजिक विकास महाशाखाका स्वास्थ्य अधिकृत रितेश जयसवालले जानकारी दिए । अहिले महानगरको पाँच स्थानमा स्थापना गरिएको सेन्टरबाट विशेषज्ञ डाक्टरसहितको बहिरंग सेवा सञ्चालन गरिने र अर्को वर्ष अन्य स्थानमा स्थापना भएका बर्थिङ सेन्टरबाट सेवा सञ्चालन गरिने तयारी भएको उनले बताए । यसका लागि महानगरपालिकाले बजेट समेत विनियोजन गरिसकेको छ ।
सेन्टरबाटै विशेषज्ञ डाक्टरसहितको स्वास्थ्य सेवा प्रदान गर्ने तयारी भएपछि तत्कालका लागि ‘मेयर घरदैलो स्वास्थ्य शिविर कार्यक्रम’ स्थगित गरिएको स्वास्थ्य अधिकृत जयसवालको भनाइ छ । गत २०७९ भदौदेखि शुरू भएको ‘मेयर घरदैलो स्वास्थ्य शिविर कार्यक्रम’अन्तर्गत हालसम्म १० हजार २३३ जनाले स्वास्थ्य परीक्षण गराएको महानगरपालिकाको स्वास्थ्य तथा सामाजिक विकास महाशाखाले बताएको छ । महानगरपालिकाका १२ वडामा सञ्चालन गरिएको ‘मेयर घरदैलो स्वास्थ्य शिविर कार्यक्रम’अन्तर्गत १० हजार ८८५ जनाले स्वास्थ्य जाँचका लागि नाम दर्ता गराएकोमा ६ हजार ४२१ महिला र तीन हजार ८१२ पुरुष गरी १० हजार २३३ जनाले सेवा लिएका थिए ।
सोही कार्यक्रममा ४५३ जनाले यूएसजी सेवा, ६७ जनाले ईसीजी सेवा र दुई हजार १७२ जनाले ल्याब परीक्षण सेवा लिएका छन् । जाँच गराएकोमध्ये २९ महिला र १६ पुरुष गरी ४५ जनालाई थप उपचारका लागि सिफारिश गरिएको स्वास्थ्य अधिकृत जयसवालले बताए । ‘मेयर घरदैलो स्वास्थ्य शिविर कार्यक्रम’मा तीन विशेषज्ञ डाक्टरसहित नर्स, अनमी र एचए एक/एक, तीन अहेब र दुई ‘ल्याब एसिस्टेन्ट’ परिचालन गरिएको थियो । रासस
