सुर्खेतमा ६० पत्रकारको निःशुल्क आँखा जाँच

कर्णाली ।कर्णाली प्रदेशको राजधानी जिल्ला सुर्खेतमा कार्यरत ६० पत्रकारको निःशुल्क आँखा जाँच गरिएको छ ।

नेपाल पत्रकार महासङ्घको ६८औँ स्थापना दिवसको अवसरमा महासङ्घ सुर्खेतको समन्वय तथा नेपाल नेत्र ज्योति सङ्घसँगको सहकार्यमा सुर्खेतका पत्रकारको निःशुल्क आँखा जाँच गरिएको हो ।

महासङ्घ सुर्खेतमा आज पत्रकारका लागि निःशुल्क आँखा शिविर सञ्चालन गरिएको थियो । शिविरमा खटिएका चिकित्सक दीपेन्द्र सहनीले शिविरमा ६० पत्रकारको आँखा जाँच गरिएको र देखिएको समस्याअनुसार निःशुल्क औषधिका साथै चस्मा उपलब्ध गराइएको जानकारी दिनुभयो । उहाँले भन्नुभयो, “जाँचका क्रममा आँखामा समस्या देखिनुको प्रमुख कारण पत्रकारले ल्यापटप, कम्प्युटर, मोबाइल जस्ता इलेक्ट्रोनिक वस्तु बढी चलाउनु नै रहेको पाइएको छ ।”

नेपाल नेत्र ज्योति सङ्घअन्तर्गत एकीकृत आँखा तथा कान कार्यक्रमका कर्णाली प्रदेश संयोजक मानबहादुर कुँवरले पत्रकार अधिकतम समय विद्युतीय सामग्रीमा बिताउने गरेका कारण आँखामा विभिन्न समस्या देखिएको जनाउनुभयो । ती समस्या समाधान गर्नुका साथै कर्णालीमा अन्धोपनलाई हटाउन आँखा उपचारका निम्ति फरक रणनीति बनाएर सङ्घले काम गर्दै आएको उहाँको भनाइ थियो । रासस