काठमाडौं । स्वास्थ्य दर्पण राष्ट्रिय हेल्थ अवार्ड २०८० बाट विभिन्न क्षेत्रका चिकित्सक, स्वास्थ्यकर्मी र पत्रकार सहित २२ जना सम्मानित हुनुभएको छ । स्वास्थ्य क्षेत्रमा पुर्याएको योगदानको कदर गर्दै उहांँहरुलाई सम्मानित गरिएको हो ।
यसरी सम्मानित हुनेहरूमा रेडियो नेपालका कार्यकारी निर्देशक बुद्धिबहादुर केसीसहित वरिष्ठ चिकित्सकहरू डा.ओममुर्ती अनिल, डा.दिव्यासिंह शाह, डा.राजेश नेपाल, डा.विश्वराम पौडेल, डा.डम्मर खड्का, डा.सुभेषराज कायस्थ, डा.सचिन ढुङ्गेल लगायत व्यत्तित्व रहनुभएको छ ।
स्वास्थ्य क्षेत्रमा कार्यरत चिकित्सक तथा स्वास्थ्यकर्मीको योगदानको कदर स्वरूप सम्मान प्रदान गरिएको स्वास्थ्य दर्पण मिडिया नेटवर्कका अध्यक्ष सन्दीपकुमार श्रेष्ठले जानकारी दिनुभयो ।
समारोहलाई सम्बोधन गर्नुहुँदै पूर्व उपप्रधानमन्त्री एवं नेपाली कांग्रेसका नेता प्रकाशमान सिंहले लामो सङ्घर्षपछि प्राप्त वर्तमान उपलब्धिको अनुभूति जनताले गर्ने गरी काम गर्नुपर्ने बताउनुभयो । पूर्व उपप्रधानमन्त्री सिंहले देशको समृद्धि र जनताको सेवा सुविधा सहज बनाई परिवर्तनको अनुभूति दिने काममा यो वा त्यो नभनीकन साझा प्रयासको आवश्यकता रहेको बताउनुभयो ।
कार्यक्रममा नेपाली काँग्रेसका नेता नैनसिंह महरले स्वास्थ्य बीमाको प्रभावकारी कार्यान्वयन गर्न सके जनताले राहतको महसुस गर्ने बताउनुभयो ।
कार्यक्रमको अतिथिमा वरिष्ठ पत्रकार किशोर नेपाल, सहित देशैभरबाट वरिष्ठ चिकित्सकहरुको उल्लेखनीय सहभागिता रहेको थियो । नेटवर्कले स्वास्थ्य क्षेत्रका व्यक्तित्वहरुलाई अवार्ड र सम्मान गर्दै आएको छ । अवार्ड यस क्षेत्रमा काम गर्ने व्यक्तित्वहरुलाई उर्जा र उत्साह दिने उहांँको भनाई छ । साथै कार्यक्रमले यस क्षेत्रका विषयमा बहस पैरवी हुनुका साथै समस्या समाधानमा समेत महत्वपूर्ण भूमिका खेल्ने अध्यक्ष श्रेष्ठले बताउनु भयो ।
