काज फिर्ताको विषय एक महिनामा टुङ्गिन्छ : मन्त्री बस्नेत

बाँके । स्वास्थ्य तथा जनसङ्ख्या मन्त्री मोहन बस्नेतले एउटै व्यक्ति लामो समयसम्म एकै ठाउँमा बसेर सेवा दिन नपाउने भन्दै ती कर्मचारीलाई अन्यत्र सरुवाको प्रक्रिया अघि बढाउन निर्देशन दिएका दिनुभएको छ ।

बिहीबार नेपालगन्जमा भेरी अस्पतालको निरीक्षण गर्ने क्रममा अस्पताल विकास समितिले आयोजना गरेको कार्यक्रमलाई सम्बोधन गर्दै उहाँले पहुँच र पावरको भरमा मन्त्रालय र आफ अनुकूल ठाउँमा वर्षौँदेखि काजमा बस्नेहरू अब एक महिनाभित्रै आफ्नो दरबन्दीमा जाने बताउनुभयो ।

उहाँले कतै चाहिएको भन्दा धेरै स्वास्थ्यकर्मी हुने र कतै स्वास्थ्यकर्मीको अनुहारै नदेखिने स्थिति आएपछि काज फिर्ताको कामलाई प्रभावकारी रुपमा कार्यान्वयन गर्न लागिएको पनि स्पष्ट पार्नुभयो । उहाँले मन्त्रालयले दरबन्दी बढाउने र क्यान्सरजन्य रोगविरुद्ध प्राथमिकता दिएर काम गर्ने योजना बनाएको बताउनुभयो।

मन्त्री बस्नेतले काज फिर्ता हुन थालेपछि चिकित्सकको अनुहार नै नदेखिएका विकटका ठाउँका जनताले चिकित्सकीय सेवा पाउन थालेको समेत स्मरण गराउनुभयो । संविधानले नै स्वास्थ्यलाई मौलिक हकका रुपमा स्थापित गरिसकेकाले पैसा र उपचार अभावका कारण कसैले पनि ज्यान गुमाउन नपरोस् भन्ने सवालमा मन्त्रालय स्पष्ट रहेको उहाँको भनाइ छ ।

मन्त्री बस्नेतले अस्पतालको फोहोर व्यवस्थापनमा विशेष ध्यान दिन व्यवस्थापन समितिलाई निर्देशन दिनुभयो । रासस