काठमाडौँ । न्याम्स र नेपाल सशस्त्रप्रहरी अस्पतालबीच शैक्षिक कार्यक्रम सञ्चालन गर्ने समझदारी भएको छ ।
स्वास्थ्य तथा जनसङ्ख्यामन्त्री मोहनबहादुर बस्नेतको उपस्थितिमा मन्त्रालयका आज आयोजित समारोहमा चिकित्सा विज्ञान राष्ट्रिय प्रतिष्ठानका उपकुलपति प्राडा भुपेन्द्र बस्नेत र नेपाल सशस्त्र प्रहरी अस्पतालका मेडिकल डाइरेक्टर डा रुपक महर्जनले शैक्षिक कार्यक्रम विस्तार गर्ने समझदारीपत्रमा हस्ताक्षर गर्नुभयो ।
समझदारी प्रतिष्ठानले निकट भविष्यमा आफ्ना उच्च तहका शैक्षिक कार्यक्रम सशस्त्र अस्पतालमा पनि विस्तार गर्ने बताइएको छ । मन्त्री बस्नेतले गुणस्तरीय स्वास्थ्य सेवा उपलब्ध गराउन उच्चस्तरको दक्ष जनशक्ति आवश्यक पर्ने बताउँदै उक्त समझदारीले स्वास्थ्य क्षेत्रमा थप दक्ष जनशक्ति उत्पादन हुने आशा व्यक्त गर्नुभयो ।
“जनतालाई आधारभूत स्वास्थ्य उपचार सेवा उपलब्ध गराउन यस समझदारीले थप भूमिका खेल्नेछ । मन्त्रालयका लागि यो खुशीको कुरा हो”, मन्त्री बस्नेतले भन्नुभयो, “सशस्त्र प्रहरीले शान्ति सुरक्षासँगै स्वास्थ्य उपचारको क्षेत्रमा उल्लेखनीय काम गरेको छ, सशस्त्र प्रहरी अस्पताललाई आवश्यकता सबै प्रकारको सहयोग उपलब्ध गराउन तयार छौँ ।”
सशस्त्र प्रहरी महानिरीक्षक राजु अर्यालले प्रतिष्ठानसँगको शैक्षिक समझदारी आफूहरुका लागि ठूलो उपलब्धी भएको बताउनुभयो । उहाँले उक्त समझदारीले भविष्यमा मेडिकल कलेजको रुपमा सञ्चालन गर्न सहयोग पुग्ने बताउनुभयो ।
स्वास्थ्य तथा जनसङ्ख्या मन्त्रालयको सचिव डा देवकुमारी गुरागाईंले चिकित्सा क्षेत्रमा उच्चस्तरको जनशक्ति उत्पादन गर्ने क्षेत्रमा यो समझदारीले फड्को मार्ने बताउनुभयो ।
उपकुलपति प्राडा बस्नेतले न्याम्सका पदाधिकारीले निरीक्षण गर्दा सशस्त्र प्रहरी अस्पतालले प्रदान गरिरहेको उपचार सेवा र प्रर्याप्त भौतिक पूर्वाधार भएको पाइएपछि शैक्षिक कार्यक्रम सञ्चालन गर्नका लागि समझदारीपत्रमा हस्ताक्षर गरेको जानकारी दिनुभयो ।
सशस्त्र प्रहरी अस्पतालका मेडिकल डाइरेक्टर डा महर्जनले उक्त समझदारी पछि सशस्त्र प्रहरी अस्पतालमा शैक्षिक वातावरण सिर्जना हुने र गुणस्तरीय स्वास्थ्य सेवा प्रदान गर्ने कार्यमा सकारात्मक प्रभाव पार्ने बताउनुभयो । एक सय १० शययाबाट सुरु गरिएको सशस्त्र प्रहरी अस्पताल अहिले एक सय ९० शययामा सञ्चालित छ । रासस
