काठमाडौं । स्वास्थ्य तथा जनसंख्या मन्त्री मोहनबहादुर बस्नेतले मोरङको उर्लाबारीमा कात्तिक २६ गते लक्ष्मीपुजाको राती भएको आगजनीमा परेर घाइते भएकाहरुको स्वास्थ्य अवस्था बारे जानकारी लिएका छन् ।
घाईतेहरुको स्वास्थ्य अवस्थाका बिषयमा जानकारी लिन र उनीहरुलाई भेट्न मन्त्री बस्नेत बिहीबार किर्तीपुर बर्न अस्पताल पुगेका हुन् ।
उर्लाबारीमा भएको आगजनीमा परेर घाइते भएकाहरु मध्ये २५ जनाको उपचार किर्तीपुर बर्न अस्पतालमा भइरहेको छ । अस्पतालका अनुसार उनीहरु मध्ये ९ जनाको अवस्था गम्भिर भएकाले आईसियू (सघन उपचार कक्ष ) मा राखेर उपचार भइरहेको छ । बाँकी बिरामीको प्लाष्टिक सर्जरी वार्ड र जनरल वार्डमा उपचार भइरहेको छ ।
स्वास्थ्य मन्त्री बस्नेतले उपचाररत घाइतेहरु, उनीहरुका आफन्त र उपचारमा संलग्न चिकित्सकहरुलाई भेटेर उपचार अवस्थाको जानकारी लिनुका साथै उपचार खर्च तिर्न नसक्नेहरुको उपचार खर्च राज्यले बेहोर्ने आश्वासन समेत दिएका छन । मन्त्री बस्नेतले उपचाररत घाइतेहरुलाई भेटेर उपचारमा कुनै कमी नहुने र सरकारले उपचारमा सक्दो सहयोग गर्ने प्रतिबद्धता व्यक्त गरे । मन्त्री बस्नेतले भने, ‘पैसा नभएको कारण कसैको पनि उपचार रोकिनु हुदैन । पैसा तिर्न नसक्नेहरुका लागि सरकार छ । सरकारले त्यो कर्तव्य पुरा गर्छ । ’
मन्त्री बस्नेतले जलनका विरामीहरुका लागि किर्तीपुर अस्पतालले उत्कृष्ट काम गरिरहेको स्मरण गर्दै स्वास्थ्य तथा जनसंख्या मन्त्रालयले अस्पतालको विकासका लागि सक्दो सहयोग गर्ने आश्वासन दिए । किर्तीपुर अस्पतालका मेडिकल डाइरेक्टर डा.शंकरमान राईले उर्लाबारी घटनाका समेत गरि हाल अस्पतालमा ४४ जना जलनका विरामीको उपचार भइरहेको जानकारी दिए । उपचाररत घाइतेहरुको उपचारमा कुनै कमी आउन नदिन अस्पतालले सक्दो प्रयास गरिरहेको उनको भनाई छ ।
उनले एक महिनापछि अस्पतालमा विदेशबाट समेत अस्थायी रुपमा चिकित्सकहरुलाई काम गर्न आमन्त्रण गरेको बताए । अस्पतालको जलन विभाग प्रमुख डा. किरण नकर्मीले उर्लावारी आगजनी घटनाका उपचाररत २५ जना घाइतेमध्ये ५ जनाको भोली शल्यक्रिया गर्ने तयारी भइरहेको जानकारी दिए ।
उर्लाबारी -७ बरगाछीस्थित दीपक कार्कीको घरमा सञ्चालित सुन पसलमा आइतबार राती आगलागी हुँदा चार प्रहरीसहित २८ जना जलेर सख्त घाइते भएका थिए । पसलमा आगलागी भएसँगै ग्यासको सिलिण्डर विस्फोट हुँदा आगोको लप्कामा परेर उनीहरु घाइते भएको प्रहरीको भनाई छ ।
