काठमाडौँ । इपिडिमियोलोजी तथा रोग नियन्त्रण महाशाखा (इडिसिडी)ले विश्व स्वास्थ्य सङ्गठनको सहयोगमा आयोजना गरेको फिल्ड इपिडिमियोलोजीसम्बन्धी पहिलो राष्ट्रिय सम्मेलन आजदेखि सुरु भएको छ ।
‘सबल स्वास्थ्यका लागि एकता, फिल्ड इपिडिमियोलोजी, निगरानी र नीतिगत निर्देशन’ भन्ने नाराका साथ दुईदिने सम्मेलन आजदेखि सुरु भएको हो । सम्मेलनमा सम्बन्धित सरकारी निकायका प्रतिनिधि, प्रकोप महामारीमा खटिने कर्मचारी, जनस्वास्थ्यविज्ञ, इपिडिमियोलोजिस्ट र प्रयोगशाला विशेषज्ञहरुको उपस्थितिसँगै मौखिक र पोस्टर प्रस्तुति रहनेछ ।
सम्मेलनको उद्घाटन सत्रमा बोल्दै स्वास्थ्य तथा जनसङ्ख्या मन्त्रालयका सचिव डा विकास देवकोटाले फिल्ड इपिडिमियोलोजिस्टहरुले रोग नियन्त्रणमा ठूलो भूमिका पु¥याउने बताउनुभयो । उहाँले भन्नुभयो, “हामीले कीटजन्य रोगहरुको नियन्त्रणका लागि बजेटमा ध्यान नदिएको हो कि । प्रदेश र स्थानीय तहमा फिल्ड इपिमिडियोलोजिस्टहरुलाई प्रोत्साहन गरेर राम्रो प्रगति भएको देख्न चाहन्छौँ । कतै ‘आउटब्रेक’ भयो भने कुन तहले गर्ने भनेर अलमलिन्छौँ । उहाँहरुले नेतृत्व लिनुपर्छ ।”
फिल्ड इपिडिमियोलोजिस्ट भनेका कुनै पनि रोगको विषयमा फिल्डमै पुगेर खोज अनुसन्धान गरी रोग नियन्त्रणमा उपाय खोज्ने विशेषज्ञ हुन् । सम्मेलनको उद्देश्यमाथि प्रकाश पार्दै इडिसिडीका इपिडिमियोलोजी तथा रोग नियन्त्रण महाशाखा (इडिसिडी) इपिडिमियोलोजी तथा रोग नियन्त्रण महाशाखा (इडिसिडी)का शाखा प्रमुख डा हेमन्तचन्द्र ओझाले फिल्ड इपिडिमियोलोजी र प्रकोप प्रतिक्रियासम्बन्धी अनुभवहरु र अध्ययनहरु साझा गर्दै रोग निगरानी, पहिचान, प्रतिकार्यसम्बन्धी अनुसन्धान तथा नवीनतम अभ्यास सुदृढ गर्ने उद्देश्यका साथ यो सम्मेलन आयोजना गरिएको बताउनुभयो ।
सार्वजनिक स्वास्थ्य जोखिम न्यूनीकरणका लागि रोगको जोखिम समयमै अनुसन्धान, दु्रत प्रतिकार्य र तथ्यमा आधारित निर्णय अत्यन्त जरुरी भएकाले यो सम्मेलनले रोग अनुसन्धान तथा नियन्त्रणमा संलग्न सरोकारवालाहलाई एकै स्थानमा ल्याउने उहाँले बताउनुभयो ।
नेपालमा पनि एफइटिपी (फिल्ड इपिडिमियोलोजी ट्रेनिङ प्रोग्राम) सन् २०२२ देखि सुरु भएको हो । हालसम्म १८५ जनाले यस्ता तालिम लिइसकेका छन् । यो कार्यक्रम जनस्वास्थ्यविज्ञहरुलाई जनस्वास्थ्य जोखिम र प्रकोपहरूको अनुसन्धान र नियन्त्रण गर्न आवश्यक सीपहरूमा तालिम दिनका लागि तयार गरिएको हो । रासस
