भक्तपुर । बागमती प्रदेश सरकारको स्वास्थ्य मन्त्रालयले जटिल रोगको शल्यक्रिया गर्नुअघि बिरामी बेहोस बनाउन प्रयोग गर्नका लागि भक्तपुर अस्पतालसहित सातवटा अस्पतालमा ‘एनेस्थेसिया वर्क स्टेशन’ उपलब्ध गराएको छ ।
मन्त्रालयले भक्तपुर अस्पताललाई दुई थान र बज्रबाराही अस्पताल, टोखा चण्डेश्वरी अस्पताल, रत्ननगर बकुलहर अस्पताल, चौतारा अस्पताल, पशुपति चैलागाईँ अस्पताल दोलखा र धादिङ अस्पताललाई एक–एकवटा एनेस्थेसिया वर्क स्टेशन उपलब्ध गराइएको स्वास्थ्यमन्त्री किरण थापाले आज भक्तपुरमा जानकारी दिनुभयो ।
एनेस्थेसिया वर्कस्टेसनले बिरामीलाई शल्यक्रिया अगाडि सुरक्षित रूपमा एनेस्थेसिया दिँदा मुटुको गति, अक्सिजन स्तर, रक्तचापलगायत जीवनचिह्न निगरानी गर्न र आवश्यक औषधि तथा ग्यासहरू मिलाउन सहयोग गर्ने स्वास्थ्यमन्त्री किरण थापाले बताएका छन् ।
प्रदेश सरकारले अस्पतालमा सेवाको गुणस्तर वृद्धि गर्न र सेवाग्राहीको गुनासो सम्बोधन गर्न हरसम्भव प्रयास गरिरहेको र अन्य आवश्यक उपकरण पनि क्रमशः उपलब्ध गराइने उहाँले बताउनुभयो ।
यसअघि यसै साता प्रदेश स्वास्थ्य मन्त्रालयले मिर्गौलाको डायलासिस सेवा विस्तारको लक्ष्यसहित भक्तपुर अस्पताललाई पाँच थान र हेटौँडा अस्पताललाई तीन थान, धादिङ अस्पताल, सिन्धुली अस्पताल, त्रिशूली अस्पताल र बकुलहर रत्ननगर अस्पताललाई दुई–दुई थान डायलायसिस मेसिन उपलब्ध गराएको थियो । रासस
