लिमा । पेरूमा भएको रेल दुर्घटनामा एक जनाको मृत्यु भएको र कम्तीमा ४० जना घाइते भएका छन्। मृतकमध्ये एक रेल चालक रहेको कुस्कोको प्रोसिक्युटर कार्यालयले पुष्टि गरेको छ।
अधिकारीहरूले घाइते यात्रुहरूको पहिचान गरिरहेको बताएका छन्। धेरैजसो घाइते विदेशी पर्यटक हुन् र अधिकांशको अवस्था गम्भीर छ। घटनास्थलमा यात्रुहरूले पठाएका भिडियोमा घाइतेहरू रेल पटरिमा लेटेका देखिएका छन्। दुर्घटनास्थलमा एक दर्जन स्वास्थ्य सवारी र चिकित्सकहरू पुगेर उपचार सुरु गरेका थिए।
प्रहरीहरूले हेल्मेट र उज्यालो रंगको ज्याकेट लगाएर घाइते यात्रुहरूलाई स्ट्रेचरमा राखेर उपचारका लागि सारिरहेका थिए। पर्यटन मन्त्रालयका अनुसार उक्त ऐतिहासिक स्थलमा दैनिक करिब चार हजार ५०० पर्यटक भ्रमणमा आउने गर्छन्। पर्यटकहरूको ठूलो हिस्सा रेल र बस प्रयोग गरेर उच्च एन्डीज पहाडमा पुग्छन्।
रेल सञ्चालन गर्ने निकायका अनुसार पेरूरेलको रेलले अर्को रेलसँग ओलान्तायटम्बो र पहाडमा रहेको प्रमुख स्थल जोड्ने एकल पटरिमा ठक्कर खाएको हो। दुर्घटनाको कारण अहिलेसम्म खुलाइएको छैन।
सन् सेप्टेम्बरमा पनि करिब एक हजार ४०० पर्यटकहरू अग्वास कालिएन्टेस रेल स्टेशनबाट निकालिएका थिए, जब स्थानीय प्रदर्शनकारीहरूले रेल पटरिमा ढुङ्गा र रुखका टुक्रा राखेर आन्दोलन गरेका थिए।
प्रदर्शनकारीहरूले पर्यटकहरूलाई तल्लो भागसम्म पुर्याउने नयाँ बस छान्न सरकारले निष्पक्ष प्रक्रिया अपनाउन माग गरेका थिए। यो ऐतिहासिक स्थल १५औँ शताब्दीमा इन्का सम्राट पचाकुटेकको आदेशमा निर्माण गरिएको थियो र वास्तुकला तथा इन्जिनियरिङको अद्भुत नमूना मानिन्छ।रासस
