दमौलीमा निःशुल्क स्वास्थ्य शिविरबाट पाँच हजार लाभान्वित

दमौली । रोटरी क्लब अफ दमौलीको आयोजनामा दमौली अस्पताल र ताइवानका रोटरीयनको सहयोगमा सञ्चालित निःशुल्क बृहत् स्वास्थ्य शिविरबाट पाँच हजार एक सय ८४ जना लाभान्वित भएका छन् ।

तनहुँको व्यास नगरपालिका–३ खुला मैदानमा भएको शिविरको पहिलो दिन एक हजार तीन सय २५ र दोस्रो दिन तीन हजार आठ सय ५९ जनाले स्वास्थ्य सेवा लिएको रोट¥याक्ट क्लब अफ दमौलीका अध्यक्ष विशाल श्रेष्ठले जानकारी दिनुभयो । उहाँका अनुसार जाडो मौसमको सुरुआती समय भएकाले हाडजोर्नीका बिरामी बढी लाभान्वित भएका छन् । स्वास्थ्य परीक्षणमा आएका बिरामीमध्ये एक हजार ५० जनाले हाडजोर्नीसम्बन्धी सेवा लिएको उहाँले बताउनुभयो ।

त्यस्तै दन्त रोगका नौ सय नौ, आँखा परीक्षण नौ सय पाँच, स्त्री रोगका सात सय पाँच, छालासम्बन्धी पाँच सय ७०, मुटुरोगसम्बन्धी पाँच सय २५, नाक, कान र घाँटीका दुई सय ७० र दुई सय ५० जनाले बालरोगसम्बन्धी स्वास्थ्य परीक्षण सेवा तथा औषधि लिएका छन् ।

परीक्षणका क्रममा देखिएका जटिल समस्यासमेत विदेशी चिकित्सकबाट समाधान गरिएको रोटरी क्लब अफ दमौलीका पूर्वअध्यक्ष एवं कार्यक्रमका सहसंयोजक दामोदर भण्डारीले जानकारी दिनुभयो । “विदेशी चिकित्सकले विशेषगरी दन्त र आँखाको स्वास्थ्य परीक्षणलाई प्राथमिकता दिएका छन् । यसका बिरामी नै बढी हुँदा योजनाअनुरुपको सेवा दिन सकेको अनुमान गरेका छौँ”, उहाँले भन्नुभयो । आँखा र दन्तबाहेकका अन्य रोगका बिरामीलाई स्वदेशकै विशेषज्ञ चिकित्सकबाट सेवा प्रवाह गरी बिरामीको उपचार गरिएको भण्डारीले बताउनुभयो ।

क्लबका अध्यक्ष रामलाल श्रेष्ठले विपन्न र स्वास्थ्य सेवाको पहुँचबाट वञ्चित नगरवासीलाई विशेषज्ञ चिकित्सकबाट विभिन्न रोगको निःशुल्क सेवा प्रवाह गर्ने उद्देश्यले गरिएको शिविरबाट धेरै लाभान्वित भएको अनुमान गरेको बताउनुभयो । ताइवानका ७४ चिकित्सकको टोलीबाट स्वास्थ्य सेवा प्रवाह गरिएको उहाँले बताउनुभयो ।

स्वास्थ्य शिविरमा दाँत, हातजोर्नी, आँखा, स्त्री तथा प्रसूति रोग, यौनरोग, बालरोग, प्रयोगशाला परीक्षण सेवा, एक्सरे÷भिडियो एक्सरे सेवा प्रदान गरिएको थियो । उक्त शिविरमा निःशुल्क औषधिसमेत वितरण गरिएको कार्यक्रमका संयोजक रजिनलाल श्रेष्ठले बताउनुभयो ।

व्यास नगरपालिका, म्याग्दे गाउँपालिका र शुक्लागण्डकी नगरपालिकाको विशेष सहयोगमा सञ्चालन भएको शिविरमा इनरह्विल क्लब दमौली, रोट¥याक्ट्र क्लब अफ दमौली, रोट¥याक्ट क्लब वेदव्यास र रोट¥याक्ट क्लब भानु र भिमादले स्वयंसेवी र दमौली अस्पताल, रोट¥याक्ट क्लब अफ पोखरा र रोटरी क्लब अफ ताइवानको विशेष सहयोगमा उक्त शिविर सञ्चालन गरिएको हो । रासस