रत्ननगरनगरपालिका र सिएमसीबीच सम्झौता : उपचारमा २० प्रतिशत,औषधिमा ७ प्रतिशत छुट

चितवन । रत्ननगर नगरपालिका र चितवन मेडिकल कलेज (सिएमसी), भरतपुरबीच रत्ननगरवासीलाई स्वास्थ्य उपचारमा छूट दिने सहमति भएको छ ।
रत्ननगर नगरपालिकाका नगरप्रमुख प्रलाद सापकोटा र चितवन मेडकल कलेजका निर्देशक डा. दयाराम लम्सालबीच रिफर भएका नगरक्षेत्रका बिरामीलाई २० प्रतिशत छूट दिने सम्झौतापत्रमा हस्ताक्षर भएको हो । सम्झौता २०८० फागुन १ गतेदेखि २०८४ चैत मसान्तसम्म लागू हुनेछ ।
चितवन मेडिकल कलेजसँग सम्झौता भएसँगै रत्ननगर नगरपालिकाका ९० हजार नगरवासीले सबै किसिमका उपचार सेवामा २० प्रतिशत छूट पाउने भएका छन । साथै अस्पतालको फार्मेसीमा ७ प्रतिशत छूटमा औषधि पाउनेछन् ।

यसैगरी सिटिइभिटीअन्तर्गतको रोयल क्यान्सर इन्स्टिच्युटको पढाइमा नगरपालिकाका विद्यार्थीले नगरपालिकाको सिफारिसमा १० प्रतिशत छूट पाउने सम्झौतामा उल्लेख छ ।
सम्झौता पश्चात नगरप्रमुख सापकोटाले चितवन मेडिकल कलेजसँग भगिनी सम्बन्ध स्थापना भएसँगै उपचार सहुलियत कार्डको व्यवस्था गरी २० प्रतिशत छूटको सुविधा पाइने बताए ।
विपन्न नगरवासीको उपचारका लागि बकुलहर रत्ननगर अस्पतालमा स्वास्थ्य बिमा सुविधाका साथै असहाय तथा अशक्तका लागि ३० लाख रुपैयाँको उपचारकोषको व्यवस्था गरिएको बताउँदै स्वेच्छाले सिएमसीमा उपचार गराउनेका लागि २० प्रतिशत छूटको व्यवस्था गरिएको बताए । स्थानीय सरकारले जनताको हकहितका लागि सिएमसीसँग सम्झौता गरिएको उनको भनाइ थियो ।

स्वास्थ्य उपचारमा छूट दिने सम्झौता आदानप्रदान कार्यक्रममा नगर उपप्रमुख यादवप्रसाद पाठक, प्रमुख प्रशासकीय अधिकृत सुकदेव लम्साल, विज्ञ सल्लाहकार रामहरि न्यौपाने, नगरप्रवक्ता कुलप्रसाद सापकोटा लगायतको सहभागिता रहेको थियो ।