चितवन । नेपाल कम्युनिष्ट पार्टी (एमाले) निकटको स्वास्थ्य तथा जनसंख्या विभाग राष्ट्रिय स्वास्थ्यकर्मी महासंघ भरतपुर महानगर कमिटीको आयोजनामा चितवनको मेघौलीमा गरिएको वृहत निःशुक स्वास्थ्य शिविरमा ४५० जनाले स्वास्थ्य जाँच गराएका छन् ।
भरतपुर महानगरपालिका वडा नं. २७ मेघौली स्थित जानकी उच्च मा.वि. परिसरमा आयोजित शिविरमा जनरल मेडिसिनका विरामी २०० जना, स्त्री तथा प्रसूति रोगका १५० जना, हाडजोर्नीका ७४ जना साथै दन्त रोग सम्वन्धी २६ जनाको स्वास्थ्य चेकजाँच गरिएको हो ।
शिविर वरिष्ठ फिजिसियन प्रा.डा.विजय प्रसाद पौडेल नेतृत्वको मेडिकल टीममा डा.सन्दीप पाण्डे, डा. दिप्ती शर्मा, डा.प्रतिक न्यौपाने, डा.सरस्वती अर्याल, डा.ऐलिग बास्कोटा ,डा.सुवास थापा लगायतका चिकित्सक तथा स्वास्थ्यकर्मीहरुले बिरामीहरुको स्वास्थ्य परीक्षण गरि आवश्यक अनुसार औषधिसमेत वितरण गरिएको थियो ।
एमाले चितवनका स्वास्थ्य विभाग प्रमुख भक्ति गौतमको अध्यक्षतामा भएको कार्यक्रममा एमाले केन्द्रीय सदस्य एवं भरतपुर महानगर इन्चार्ज जेएन थपलिया प्रमुख अतिथि रहनुभएको थियो । शिविरमा एमाले प्रदेश पूर्व सांसदहरु कृष्णप्रसाद भूर्तेल र विजय सुवेदी, एमाले जिल्ला अध्यक्ष रामप्रसाद न्यौपाने, राष्ट्रिय स्वास्थ्यकर्मी महासंघका उपाध्यक्ष रामहरी ढकाल र विद्यालय व्यवस्थापन समितिका पदाधिकारीहरु लगायतको उपस्थिति रहेको थियो ।
शिविर कार्यक्रमको सञ्चालन एमाले स्वास्थ्य तथा जनसंख्या विभागका सदस्य विज्ञान पौडेलले गर्नुभएको थियो ।
