चितवनमा ३६ हजार ७१४जना बालबालिकालाई पोलियो विरुद्धको खोप लगाईंदै

चितवन । । यही जेठ १३ गतेदेखि सञ्चालन हुने पोलियो रोगविरुद्धको आइपिभी खोप कार्यक्रमअन्तर्गत चितवनका ३६ हजार सात सय १४ बालबालिकालाई आइपिभी खोप लगाउने तयारी गरिएको छ ।
विसं २०७३ वैशाखदेखि २०७५ असोजसम्मका बालबालिकालाई यही जेठ १३ गतेदेखि देशभर एकैसाथ सञ्चालन हुने पोलियो रोगविरुद्धको आइपिभी खोप उपलब्ध गराउने सरकारको निर्धारित कार्यक्रमअन्तर्गत चितवनमा पनि खोप कार्यक्रम तय गरिएको हो ।
चितवनका सातै पालिकामा पोलियो विरुद्धको खोप लगाउने तयारी गरिएको आज स्वास्थ्य कार्यालय चितवनले पत्रकार सम्मेलन मार्फत जानकारी दिएको हो ।

खोप कार्यक्रमका संयोजक जयराम दुवाडीले भरतपुर महानगरपालिकामा १९हजार २९४ जना, रत्ननगरनगरपालिकामा ४हजार ३६९, राप्तीमा ३हजार ८५३,कालिकामा २हजार३३४, खैरहनीमा ३ हजार २६१,माडीमा २ हजार १२९ र ईच्छाकामनामा १ हजार ४७४ जनालाई खोप लगाउने तयारी गरिएको जानकारी दिनुभयो ।

उहांँका अनुसार खोप कार्यक्रम सम्पन्न गर्न सबै पालिकामा गरी ५१० खोप केन्द्र, ४१२ जना स्वास्थ्यकर्मी, ७२३ जना स्वयंसेवक परिचालन गरिनेछ ।
स्वास्थ्य तथा जनसंख्या मन्त्रालयको निर्धारित कार्यक्रमअन्तर्गत जिल्लाका सातवटै स्थानीय तहमा एकैसाथ खोप कार्यक्रम शुरु गर्ने गरी तयारी गरिएको स्वास्थ्य कार्यालय प्रमुख दिनेश रुपाखेतीले जानकारी दिनुभयो । “विसं २०७३ वैशाखदेखि विसं २०७५ असोज मसान्तसम्मको अवधिमा पोलियो खोप कार्यक्रम थिएन, सरकारले ती छुटेका बालबालिकालाई लक्षित गरेर खोप कार्यक्रम ल्याएको हो”, उहाँले भन्नुभयो, “यसअघि खोप लगाएकाले पुनः लगाउनु पर्दैन । दोहोरिएमा पनि फरक पर्देन ।’

कार्यालयका अनुसार जेठ १३ देखि १८ गते रत्ननगरपालिकामा , माडी , खैरहनी र राप्ती नगरपालिकामा जेठ १६ गतेदेखि १८ गतेसम्म, कालिकामा जेठ १३ देखि १६ गतेसम्म, ईच्छाकामनामा जेठ १४ देखि २० गतेसम्म र भरतपुरमा जेठ १३ गतेदेखि २२ गतेसम्म खोप कार्यक्रम सञ्चालन गरिने उहांँले जानकारी दिनुभयो ।

नेपालमा सन् २०२२ देखि २०२६ सम्ममा पोलियो रोग उन्मूलन गर्ने सरकारको रणनीतिक योजना रहेको छ । विसं २०७३ वैशाखदेखि २०७५ असोजसम्मको अवधिमा देशभर गरी छुटेका करिब १४ लाख ६२ हजार बालबालिकालाई पोलियो रोगविरुद्धको आइपिभी खोप उपलब्ध गराउने तयारी गरिएको हो ।
पोलियो रोगविरुद्धको खोप नलगाएमा स्थायीरुपमा पक्षघात तथा मृत्यु हुन सक्ने स्वास्थ्यकर्मीले बताएका छन् । सबैभन्दा बढी पाँच वर्षसम्मका बालबालिका पोलियो रोगको भाइरसबाट सङ्क्रमित हुन सक्ने जनाइएको छ ।