भकिम्लीमा स्वास्थ्य चौकी

म्याग्दी । बेनी नगरपालिका–३ भकिम्लीमा स्वास्थ्य चौकीको भवन निर्माण भएको छ । बेनी नगरपालिकाको रु ५० लाख बजेटमा सभाहलसहित पाँच कोठे एक तले पक्की भवन निर्माण भएको हो । बेनी नगरपालिका–३ का वडाध्यक्ष पदमबहादुर पुनले नयाँ भवनबाट स्वास्थ्य चौकीको सेवा सञ्चालन हुने जानकारी दिनुभयो ।

“स्वास्थ्य चौकी सञ्चालन भइरहेको नमूना आमा समूहको पुरानो भवन जीर्ण बन्दा पानी चुहिने समस्या थियो”, उहाँले भन्नुभयो, “बेनी नगरपालिकाबाट आर्थिक वर्ष २०७९÷०८० मा रु ३० लाख र २०८०÷८१ मा रु २० लाख बजेट विनियोजन गरेर भवन बनाएका हौँ ।”

नयाँ भवनमा सभाहलसहित उपचार, सहायता, स्वास्थ्यकर्मी, प्रशासन र औषधि भण्डारण कक्ष रहेको भकिम्ली स्वास्थ्य चौकी भवन निर्माण समितिका अध्यक्ष भोजबहादुर थापाले बताउनुभयो । स्वास्थ्य चौकीको नयाँ भवन निर्माणपछि करिब एक हजार घरधुरी
लाभान्वित हुने उहाँको भनाइ थियो ।

जीर्ण, साँघुरो र पानी चुहिने कच्ची भवनमा स्वास्थ्य संस्था सञ्चालन गर्दा नागरिकलाई समस्या भएको थियो । स्वास्थ्य चौकीको भवन बनाउन स्थानीय पृथीलाल खत्रीका परिवारले आठ रोपनी जग्गा निःशुल्क उपलब्ध गराउनुभएको थियो ।

यसअघि वान हर्ट संस्था र बेनी नगरपालिकाको साझेदारीमा रु ४५ लाखको लागतमा चार कोठे प्रसूति गृह निर्माण भएको थियो । उक्त संस्थाले भवनमा प्रसूति सेवाका लागि उपकरण सहयोग गरेको छ । रासस