रसुवा । जिल्ला अस्पताल, धुन्चेमा पर्याप्त औषधि र चिकित्सकको व्यवस्था भएसँगै थप उपचारका लागि जिल्लाबाहिर बिरामी पठाउने दर करिब ९५ प्रतिशतले कमी आएको छ ।
जिल्लास्थित अस्पतालमा आवश्यक स्वास्थ्यकर्मी तथा औषधिको व्यवस्था भएकाले उपचारका क्रममा आउने गम्भीर प्रकृतिको बिरामीको समेत उपचार सम्भव भएपछि अन्यत्र ‘रेफर’ गर्ने दर ह्वात्तै घटी पाँच प्रतिशतमा झरेको रसुवा जिल्ला अस्पतालले स्पष्ट गरेको छ ।
यसअघि दक्ष चिकित्सक र अत्यावश्यक औषधिको अभावमा बिरामीलाई दुखाइ कम गर्ने औषधि खुवाएर वा इन्जेक्सनमार्फत लठ्याएर बाहिरका अस्पतालमा पठाउनुपर्ने परिस्थितिमा उल्लेख्य सुधार भएको भनीे जिल्लावासी खुसी देखिन्छन् ।
जिल्ला अस्पतालका वरिष्ठ चिकित्सक डा अमितकुमार शाहका अनुसार स्रोतसाधनको अभावमा यसअघि अन्यत्र सिफारस गर्नुपर्ने बाध्यात्मक अवस्था भएकामा पछिल्लो समयमा नेपाल सरकारबाट प्राप्त जनशक्ति र औषधिको व्यवस्थासहित स्वास्थ्यकर्मीको अथक प्रयासबाट ९५ प्रतिशत बिरामीको उपचार स्थानीय अस्पतालमा सम्भव भएको हो ।
चालु आव २०८१÷८२ को साउनदेखि अहिलेसम्म अन्तरङ्ग सेवाअन्तर्गत जिल्ला अस्पतालमा उपचार गर्न आएका १६९ जनामध्ये अति जटिल प्रकिृतिका २८ बिरामीलाई भने थप उपचारका लागि अन्यत्रको अस्पतालमा लैजान भनी सिफारिस गरेको डा शाहले जानकारी दिनुभयो ।
‘नेक्स साइमन’ नामक गैह्रसरकारी संस्थाको सहयोगमा पछिल्लो डेढ वर्षमा ४३ जना गर्भवतीको सफलतापूर्वक शल्यक्रिया गरी अस्पतालमा बच्चा जन्मिएको दृष्टान्त प्रस्तुत गर्दै जिल्लास्थित नागरिक समाजका अध्यक्ष बाबुलाल तामाङले यसबाट मात्रृशिशु मृत्युदरमा कमी ल्याउन र प्रशव पीडा कम गर्न सहयोग पुगेको भनी खुसी व्यक्त गर्नुभयो ।
दैनिक ३० देखि ४० जनासम्म उपचारका लागि आउने गरेको जिल्ला अस्पतालले गत साउनदेखि अहिलेसम्म ४२३ ज्येष्ठ नागरिकसहित तीन हजार ७०० जनालाई बहिरङ्ग सेवा प्रदान गरेको जनाएको छ ।
सामान्यतया लेक लाग्ने, श्वासप्रश्वास एवं दम, गानुगोला, अपच, झाडापखाला, रुघाखोकी, ज्वरो, उच्च रक्तचाप, सुगर, जन्डिस, पिनास, घाउखटिरा, टाइफाइड, मुटुलगायत समस्याबाट पीडित व्यक्ति उपचारका लागि आउने गरेको सो अस्पतालको अभिलेखमा उल्लेख छ । अहिले रसुवा जिल्ला अस्पतालमा आठजना चिकित्सक र ३८ जना प्राविधिक जनशक्ति कार्यरत रहेको अस्पताल प्रशासनले जनाएको छ । रासस
