काभ्रेका छ नगरमा नसर्ने रोग नियन्त्रण कार्यक्रम

काभ्रेपलाञ्चोक । यहाँका छ नगरपालिकामा नसर्ने रोग नियन्त्रण कार्यक्रम सुरु गरिएको छ । सहरी क्षेत्रको जीवनशैली, रहनसहन तथा खानपानलगायतका कारण नसर्ने रोगको जोखिम बढेको जनाउँदै जिल्लास्थित जनस्वास्थ्य कार्यालयमार्फत छ नगरमा उक्त कार्यक्रम लागू गरिएको हो ।

कार्यालयले सङ्घीय सरकारको विशेष अनुदानमा धुलिखेल, बनेपा, पनौती, पाँचखाल, नमोबुद्ध र मण्डनदेउपुरमा कार्यक्रम लागू गरिएको जनाएको छ । कार्यक्रमअन्तर्गत स्वास्थ्य प्रवद्र्धनार्थ व्यायामशाला निर्माण, परामर्श कक्ष व्यवस्थापन, समुदायमा आधारित स्वास्थ्य परीक्षण, मानसिक स्वास्थ्य प्रवद्र्धन कार्यक्रमअन्तर्गत महिला स्वास्थ्य स्वयंसेविकालाई मानसिक स्वास्थ्यसम्बन्धी अभिमुखीकरण, प्रयोगशाला सबलीकरणलगायतका कार्यक्रम ती स्थानीय तहसँग सहकार्य गरी सञ्चालन गरिने कार्यालय प्रमुख रागिश्री कक्षपति श्रेष्ठले जानकारी दिनुभयो ।

श्रेष्ठका अनुसार मुटुरोग तथा नसर्ने रोग मृत्युको प्रमुख कारणमध्ये हुन् । कार्यालयले नसर्ने रोग न्यूनीकरणका लागि शहरी स्वास्थ्य कार्यक्रमबारे जानकारी गराउने उद्देश्यले ती स्थानीय तहमा जनप्रतिनिधि, कर्मचारी, स्वास्थ्यकर्मी, सञ्चारकर्मीलगायतका सरोकारवालाको सहभागितामा अभिमुखीकरण सञ्चालन गरिरहेको छ ।

यसअघि कार्यालयले गत फागुनमा समुदायमा आधारित स्वास्थ्य परीक्षणअन्तर्गत नसर्ने रोगको जोखिमबारे पत्ता लगाउन काभ्रेपलाञ्चोकका १३ स्थानीय तहमा स्वास्थ्य परीक्षण एक महिने ‘स्क्रीनिङ’ अभियान सञ्चालन गरिसकेको छ । अभियानमा उक्त उमेर समूहमा बिएमआई (बडी मास इन्डेक्स), उच्च रक्तचाप, मधुमेह तथा मृगौलाको परीक्षण गरिएको थियो भने स्वास्थ्य परीक्षणपश्चात् नसर्ने रोगको पहिचान भएकालाई परामर्श गरिएको थियो । रासस