चितवन । कुनैपनि मानिसले कुनै क्षेत्र वा कुनै ठाउंमा रहेर कति बर्ष सेवा एवं काम गर्ला ? अधिकांशको उत्तर एउटै आउंँछ अधिकतम एक दशक वा दुईदशकसम्म । तर समाजमा यस्ता व्यक्ति पनि भेटिन्छन जसले एकै ठाउंँमा रहेर झण्डै तीनदशक स्वास्थ्य सेवा गरेका छन त्यो पनि माडी जस्तो ग्रामीण क्षेत्रमा ।
यी हुन् वरिष्ठ स्वास्थ्यकर्मी गोविन्द नेपाल जो अहिले पनि माडीबासीको सेवामा निरन्तर लागिरहेका छन । माडी यस्तो ठाउंँ हो जुन ठाउंँ चितवनको पिछडिएको ठाउंँ मध्ये पर्दछ । ‘त्यतिबेला यहांँ विजुली थिएन, बाटो थिएन, यातायातको सुविधा थिएन तर अहिले केही परिवर्तन भएको छ ।’ गोविन्द संर्घषका शुरुवाती क्षणमा फर्कन्छन । आफू माडीमै जन्मिएर हुर्किएरपनि होला अहिले पनि उनको मनले माडीवासीको सेवा भन्दा बाहिर परिकल्पना गर्न सक्दैन ।
हुनत त्यतिबेला स्वास्थ्यकर्मीको अभाव उत्तिकै थियो तरपनि उनले आफ्नो सेवालाई समर्पित गर्न माडीनै रोजे । ‘मलाई चितवन लगायत अन्य जिल्लाबाट पनि धेरै अवसर आए, तर मलाई माडीबासीको मायाले कहिल्यै छोडेन ।’ उनी आफ्नो सेवाप्रति सन्तुष्ट छन । यति मात्र होइन गोविन्दले द्धन्द्धकालका घटनाहरु पनि भोगे, जन आन्दोलनका घटनाहरु पनि भोगे त कतिपय दुर्घटनाका घाउहरुमा मलम पट्टी लगाए कति जंगली जनावरले आक्रमण गरेका घटनाहरु पनि व्यहोरे त्यसको लेखाजोखा नै छैन ।
जतिसुकै परिस्थितिलाई पनि सहज रुपमा लिने स्वभाव भएरपनि होला उनी यही क्षेत्रमा स्थापित छन । हिजोआज पनि माडीमा जुनसुकै घटनाबाट मानिसहरु घाइते हुन्छन या बिरामी हुन्छन गोविन्दलाई नसम्झने कम नै छन । ‘मैले दिएको सेवाबाट सन्तुष्ट भएर होला प्राय सबैले मलाईनै सम्झन्छन उनी भन्छन, यो म प्रति माडीबासीले देखाएको सद्भाव हो विश्वास हो ।‘
हुनत त्यहांँ सरकारी मातहतको बघौडा अस्पताल पनि छ , त्यो अस्पतालसंँग पनि कतिपय बिरामीका बिषयमा उनले सहकार्य गर्दै पनि आएका छन । तर त्यो पर्याप्त छैन । अझैपनि कतिपय ठूला दुर्घटना, गम्भिर विरामीका लागि भरतपुर धाउनु पर्ने बाध्यता कायमनै छ ।
त्यसैले उनले सरकारले विशिष्टकृत सेवा सहितको माडीमा अस्पताल निर्माण गरिदिए माडीबासीलाई ठूलो राहत हुने बताउंँछन । उमेरले पांँच दशक टेकेका उनले भविष्यमा माडीलाईनै कर्म क्षेत्र बनाएर सेवालाई निरन्तर दिने प्रण गर्छन । (संक्षेपमा उनका संर्घषका कथालाई हाम्रो स्वास्थ्य दर्पण मिडिया टीमले श्रव्यदृश्य मार्फत कैद गरेको छ । अन्य विषयवस्तु तलको भिडियो लिंकमा उपलब्ध छ । )
