कोरोना भाइरसको महामारीका कारण चीनमा विवाह र जन्मदर घट्न थाल्यो

पेचिङ (चीन) । कोरोना भाइरसको महामारी अन्त्य हुने कुनै संकेत छैन । संक्रमणको एउटा लहर सकिएको केही समयपछि नयाँ लहर आइरहेका छन् ।

आर्थिक गतिविधिहरु प्रभावित भएका छन् भने आर्थिक अनिश्चय पनि बढेको छ । यस्तोमा मानिसहरुले परिवार र विवाहको योजना थाँती राख्न थालेका छन् ।
चीनमा पनि कोरोना भाइरसको महामारीका कारण विवाह र जन्मदर घट्न थालेको छ । हालैका वर्षमा बच्चा हुर्काउन र उनीहरुको शिक्षलगायतका खर्च महँगो हुँदै गएपछि चीनमा विवाहित दम्पत्तिको सन्तान योजना प्रभावित भइरहेको थियो ।

कोरोना भाइरसको महामारीले अवस्था झनै बिगारेको त्यहाँको राष्ट्रिय स्वास्थ्य आयोग (एनएचसी)ले बताएको हो । धेरैजसो युवायुवतिहरुले विवाह वा गर्भधारणको योजना थाँती राख्ने क्रमलाई निरन्तरता दिइरहेका छन् । तीव्र आर्थिक र सामाजिक घटनाक्रमहरुका कारण पनि व्यापक परिवर्तन आएको बताइएको छ ।

युवा पुस्ता शहरी क्षेत्रमा बसाई सरेर जाने, शिक्षा दिक्षामा धेरै समय बिताउने अनि उच्च दबाब भएको काम गर्ने वातावरण आदिका कारण पनि जन्म र विवाहको प्रवृत्तिमा परिवर्तन आएको एनएचसीले बताएको छ ।

कोरोना भाइरसको संक्रमण फैलिन नदिन चीन सरकारले कोभिड विरुद्धको शून्य नीति अपनाएको छ । संक्रमण बल्झिन थाल्ने बित्तिकै सरकार कठोर लकडाउन गरिन्छ । यसका कारण मानिसहरुको जनजीवनमा गहिरो र दीर्घकालीन क्षति पुर्याएको छ । यो वर्ष चीनमा शिशु जन्म कीर्तिमानी न्यून स्तरमा झर्ने क्रममा रहेको जनसांख्यिकीय विज्ञहरुले बताइरहेका छन् । यस वर्ष चीनमा १ करोडभन्दा कम शिशु जन्मने अनुमान गरिएको छ ।

गत वर्ष चीनमा १ करोड ६ लाख शिशु जन्मिएका थिए । यो सन् २०२० को तुलनामा ११ दशमलव ५ प्रतिशत कम थियो । चीनमा मृत्युदर विश्वमै सबैभन्दा न्यूनमध्येमा पर्दछ । सन् २०२१ म त्यहाँको मृत्यु दर १ दशमलव १६ प्रतिशत थियो । चीनले सन् १९८० देखि सन् २०१५ सम्म एक सन्तान नीति लागू गरेको थियो । दुई सन्तान नीतिले खासै काम गरेको छैन ।

जनसंख्या खुम्चिने क्रममा रहेपछि केन्द्रदेखि प्रान्तीय सरकारहरुले गत वर्ष कर छूट दिने स्वास्थ्य बीमा बढाउने, घर खरिदमा सहुलियत दिने देखि तेस्रा सन्तान जन्माउनेलाई अतिरिक्त रकम दिनेसम्मका उपायहरु ल्याएका थिए । तर कोरोना भाइरसको महामारीको प्रभावबीच यी उपायहरु खासै प्रभावकारी साबित भएका छैनन् । एजेन्सी