नशाको लतदेखि सावधानी विषयक अन्तरक्रिया सम्पन्न

काठमाडौं । पछिल्लो समय नशालु पदार्थको सेवन,बिकृति र बिकारको समस्या गहिरोरुपमा गाडिएको हुनाले समाजमा यसको अवस्था भयावह हुने विज्ञहरुले बताउनु भएको छ । भक्तपुरमा आयोजित नशाको लत,यसको सामना र सचेतना सम्बन्धि अन्तरक्रिया कार्यक्रममा विज्ञहरुले यस्तो कुरा बताउनुभएको हो ।

शिक्षकहरुको संगठन इशानद्वारा भक्तपुर,ख्वप छेँमा चैत्र २८ गते शिक्षकहरूका लागि सम्पन्न अन्तरक्रिया कार्यक्रममा विशेष बक्ताकोरुपमा बरिष्ठ मनोचिकित्सक प्रा.डा.धनरत्न शाक्यले नशालु मादकपदार्थ, लागूपदार्थको सेवनबाट पैदा हुने लत,मानसिक,स्नायु लगायतका शारीरिक समस्याहरुको बारेमा चर्चा गर्दै ब्यवस्थापनका विविध पक्षमाथि सहजीकरण गर्नुभएको थियो ।

यस विषयको रोकथाम,उपचार,पुर्नस्थापनामा नागरिक समाज,परिवार,विद्यालय, शिक्षक,समुदाय र सरकारले आफ्नो ठाउँबाट सचेत,सजग र जागरुक हुनुपर्ने औंल्याउँदै प्रा.डा.शाक्यले सहभागी सम्पूर्ण शिक्षकहरुलाई यो सचेतना अभियानमा परिवर्तनका सम्बाहककारुपमा भुमिका खेल्न आग्रह गर्नुभयो ।

ईशान,भक्तपुरका अध्यक्ष प्रेमजंग थापाको अध्यक्षतामा सम्पन्न सो कार्यक्रममा संघका सल्लाहकार सरोजराज गोसाइँले आफ्नो धारणा र नववर्ष २०८१को शुभकामना मन्तव्य राख्नुभएका थियो । कार्यक्रममा सहभागी भक्तपुर क्षेत्रका विभिन्न विद्यालयहरुका शिक्षकहरु उक्त प्रशिक्षणबाट लाभान्वित भएको बताइएको छ ।