चितवन । चितवनको राप्ती नगरपालिकाले सीमान्तकृत चेपाङ समुदायका गर्भवती महिलाको ज्यान जोगाउन विकट बस्तीमा बर्थिङ सेन्टर (प्रसूति गृह) सञ्चालनमा ल्याएको छ । प्रसुति गृह सञ्चालनमा आएसंँगै चेपाङ्ग समुदायलाई उपचारमा सहज भएको छ ।
सुरक्षित सुत्केरी गराउने स्वास्थ्य संस्थाको अभावका कारण अकालमै ज्यान गुमाउनुपर्ने अवस्थाको अन्त्य गर्न सो नगरपालिकाले वडा नं–१३ स्थित वासवाङ स्वास्थ्यचौकीमा बर्थिङ सेन्टर सञ्चालनमा ल्याएको हो ।
भौगोलिक विकटताका कारण व्यथा लागेपछि गर्भवती महिलालाई डोकामा हालेर अस्पतालसम्म ल्याउनुपर्ने अवस्था थियो । विकटमा रहेका चेपाङबस्तीबाट भण्डारा अस्पतालसम्म आउन करिब ५ घन्टा लाग्छ ।
विकट बस्तीका गर्भवती महिलाले सुरक्षित सुत्केरी गराउने स्वास्थ्य संस्था र उपकरण नहुँदा अकालमै ज्यान गुमाउनुपरेको भन्दै मेयर शमशेर लामाले यस्तै विकराल अवस्थाको अन्त्य गर्न बर्थिङ सेन्टर सञ्चालनमा ल्याएको बताउनुु भयो । उहांँले गाउँमै सुरक्षित प्रसूति सेवा उपलब्ध गराउनका लागि विकट क्षेत्र वासवाङमा चौबिसै घन्टा सेवा दिने गरी बर्थिङ सेन्टर स्थापना गरिएको बताउनु भयो ।
स्वास्थ्य चौकीमा आवश्यक उपकरण, जनशक्ति एवं औषधिको व्यवस्था गरेर बर्थिङ सेन्टर स्थापना गरिएको हो । ‘स्वास्थ्यचौकीमा सेवा थपेका छौँ, अब यहाँका महिलाहरुलाई सुत्केरी हुन अन्त जानुपर्ने समस्याको समाधान भएको छ’, मेयर लामाले भन्नुभयो , ‘अब व्यथा लागेपछि घर बस्ने होइन, समयमै स्वास्थ्य संस्थामा आउनुहोला ।’
उहांँले आमा र बच्चाको जीवन रक्षाका लागि सुत्केरी घरको व्यवस्था गरेको बताउनु भयो । बर्थिङ सेन्टरमा सरकारी मापदण्डअनुसारका सबै सेवा र सुविधा रहेको भन्दै उहांँले सुत्केरी गराउनकै लागि घन्टौँ हिँडेर अस्पताल जानुपर्ने बाध्यता हटेको उहांँको भनाई छ ।
सो नगरपालिकाले वासवाङ स्वास्थ्यचौकीमा बालबालिकालाई लक्षित गरी कुपोषणको उपचारका लागि बहिरङ्ग सेवा पनि सञ्चालनमा ल्याएको छ । बालबालिकामा कुपोषणको जाँच गर्ने र औषधि तथा परामर्श दिने गरी बहिरङ्ग सेवा सञ्चालनमा ल्याइएको मेयर लामाले बताउनु भयो ।
चेपाङ बालबालिकाका अभिभावकले खानपान र सरसफाइमा ध्यान नदिँदा बालबालिकामा कुपोषणको समस्या देखिएको भन्दै उनले कुपोषण भएका बालबालिकाको पनि उपचार हुने व्यवस्था गरिएको बताउनु भयो ।
सीमान्तकृत चेपाङ समुदायको बाहुल्यता रहेको सो क्षेत्रमा बर्थिङ सेन्टरका लागि आवश्यक उपकरण, जनशक्ति एवं औषधिको व्यवस्था गरेर बर्थिङ सेन्टर स्थापना तथा कुपोषणको उपचार सेवा शुरू गरिएको मेयर लामाले जानकारी दिनुभयो ।
