चितवन । भरतपुर महानगरपालिका–१४ मा रहेको शिवनगर प्राथमिक स्वास्थ्य केन्द्रमा विशेषज्ञ सेवा सुरु भएको छ । कलेज अफ मेडिकल साइन्सेस शिक्षण अस्पताल र भरतपुर आँखा अस्पतालसँगको समन्वयमा केन्द्रबाट हप्ताको तीन दिन विशेषज्ञ सेवा दिन लागिएको हो ।
विशेषज्ञ सेवाको भरतपुर महानगर प्रमुख रेनु दाहालले आज एक कार्यक्रमका बीच उद्घाटन गर्नुभयो । उहाँले स्थानीय ७२ वर्षीय नन्दकला कुँवर र ७० वर्षीय मुक्तिबहादुर घिमिरेलाई विशेषज्ञ सेवाको टिकट प्रदान गरी सेवाको औपचारिक उद्घाटन गर्नुभएको हो ।
सेवाग्राहीको चापलाई मध्यनजर गर्दै विशेषज्ञ सेवा नियमित सञ्चालन गर्न सकिने प्रमुख दाहालले बताउनुभयो । महानगरभित्र रहेको एकमात्र केन्द्रमा विशेषज्ञ सेवा सुरु गरिएको भन्दै उहाँले यस्ता सेवा अन्य स्थानमा पु¥याउने लक्ष्यका साथ महानगरले काम गर्दै आएको बताउनुभयो ।
महानगरपालिकाका उपप्रमुख चित्रसेन अधिकारीले विशेषज्ञ सेवा गाउँमा नै पाएपछि यस क्षेत्रका जनताको स्वास्थ्यका पहुँच बढ्दै जाने बताउनुभयो । उहाँले भन्नुभयो, “बिरामी भए भनेर सदरमुकामसम्म धाउनुपर्ने बाध्यता हटाउन महानगरपालिकाले काम गरिरहेको छ ।”
केन्द्रबाट हरेक हप्ताको सोमबार, बुधबार र बिहीबार विशेषज्ञ सेवा प्रदान गर्न लागिएको केन्द्रका प्रशासन प्रमुख प्रेमराज पौडेलले जानकारी दिनुभयो । विसं २०२७ मा स्थापित यस स्वास्थ्य केन्द्रमा हाल मेडिकल अधिकृत तीन जना, पारामेडिक्स नौ जना, नर्सिङ आठ जना, प्रयोगशालाकर्मी चार जना, फर्मासिस्ट दुई जना, रेडियोग्राफर एक जनासहित ३२ जना कर्मचारी कार्यरत छन् ।
यस केन्द्रले गत आर्थिक वर्षमा ४९ हजार तीन सय ७५ जनालाई स्वास्थ्य सेवा प्रदान गरेको थियो । दैनिक एक सय ६५ जना हाराहारी बिरामीको उपचार गर्दै आएको यस केन्द्रबाट नियमित खोप सेवा, आमा सुरक्षा कार्यक्रम, प्रयोगशाला, एक्सरे, गर्भ परीक्षण, समुदायमा मेयर स्वास्थ्य कार्यक्रमलगायत सञ्चालन गर्दै आएको छ । रासस
