पोखरा । पोखरामा डेंगूका बिरामीहरूको सङ्ख्यामा वृद्धि भएको छ । केही दिन यता देखि पोखराका सामुदायिक तथा निजी अस्पतालहरूमा डेंगूका बिरामीहरूको सङ्ख्यामा वृद्धि भएको पोखरा महानगरपालिका जनस्वास्थ्य निरीक्षक राजेन्द्र रेग्मीले बताउनुभयो ।
पोखरामा डेंगुका बिरामीहरू बढेसँगै पोखरा महानगरले डेंगू नियन्त्रण गर्न हरेक बिहान १०ः०० बजे देखि १०ः३० बजेसम्म हरेक सरकारी तथा गैर सरकारी संघ संस्थाहरूले आफ्नो कार्यालय वरिपरि सरसफाइसहित डेंगू रोग सङ्क्रमण फैलिन नदिन परामर्श गर्ने गराउन पोखराका मेयर धनराज आचार्यले निर्देशन दिनुभएको छ ।
पोखरामा शुक्रकारसम्मको तथ्याङ्क हेर्दा ३ सय ४६ जनामा डेंगु रोग सङ्क्रमण देखा परेको छ । कास्कीमा ४ सय ६६ जनामा डेंगू रोग सङ्क्रमण हाल फैलिएको स्वास्थ्य कार्यालय कास्कीका भेक्टर कन्ट्रोल अधिकृत यामनाथ बरालले बताउनुभयो ।
कार्यालयले दिएको तथ्याङ्क अनुसार पोखरामा ३ सय ४६ जनामा यस सङ्क्रमण देखा परेको छ भने अन्नपूर्ण र माछापुच्छ्रे«े गाउँपालिकामा समान ४/४ जनामा डेंगू संक्रमण देखापरेको बरालले जनाउनुभयो ।
सङ्क्रमण हुँदा वान्ता हुने, शरीर कमजोर हुने, खानामा रुचि नहुने, शरीरमा साना साना राता दाना हुने जस्ता लक्षण देखिनासाथ नजिकको अस्पतालमा उपचार गर्न उहाँले आग्रह गर्नुभयो । लामखुट्टेबाट हुने डेंगू रोग नियन्त्रण तथा रोकथामका लागि समुदायमा अभियान आवश्यक भएको कार्यालयले जनाएको छ ।
