बाँके । बाँकेको डुडुवा गाउँपालिकाको होलिया स्वास्थ्य चौकीले सुत्केरी पछि महिलाको घरमै पुगेर चेकजाँच थालेको छ । स्थानीय स्तरमै स्वास्थ्य सेवा प्रदान गर्ने भन्दै स्वास्थ्य चौकी होलियाले स्वास्थ्यकर्मीहरू सहितको टोली सुत्केरी आमाको घरमै पुगेर चेकजाँच सेवा दिएको स्वास्थ्य चौकी इन्चार्ज कमल उपाध्यक्षले बताउनु भयो ।
सुत्केरी र नवजात शिशुमा विभिन्न खालका रोगको सङ्क्रमणको जोखिम उच्च हुने भएकाले घरमै स्वास्थ्यकर्मी परिचालन गरी सेवा प्रदान गरेको स्वास्थ्य चौकी होलियाका सि.अनमी सीमा घर्तिमगर खानले जानकारी दिनु भयो । खानका अनुसार सुत्केरी पश्चात् हुने सुत्केरी आमा तथा नवजात शिशुको स्वास्थ्यलाई मध्यनजर गरी यो कामको थालनी गरेको हो ।
सुत्केरी पछि रगत बग्ने, ज्वरो आउने, बच्चाको स्वास्थ्य अवस्थाको जानकारी लिनको लागी हामीले नियमित रुपमा सुत्केरीको घरमै पुगेर चेकजाँच गर्न सुरु गरेको सि. अनमी खानको भनाइ थियो।
गर्भवती महिलालाई नियमित चेकजाँच र पोषिलो खाने कुरा खानु पर्छ भन्ने सल्लाह दिनुका साथै आइरन चक्की दिने गरेका छौँ नियमित गर्भ परिक्षण सेवाले मातृ मृत्युदर घटाउन सहयोग पुग्ने खानले बताउनु भयो। ‘पालिकाकाले गर्भवती महिलाको निःशुल्क गर्भ परिक्षण सेवा ‘नेपाल सरकारको प्रोटोकल अनुसार सुत्केरी भएको २४ घण्टा ३ दिन र ७ दिनमा जाँच गराउनु पर्ने भएकाले आमा र शिशुको स्वास्थ्य चेकजाँच गर्न स्वास्थ्यकर्मी घर घरमा पठाइएको पालिकाका स्वास्थ्य संयोजक हेमन्त शर्माले बताउनु भयो ।
स्वास्थ्य संस्थाले घरमै स्वास्थ्य सेवा दिँदा निकै सहज भएको सुत्केरी सेराजुन खानले बताउनु भयो । गाउँघरबाटै स्वास्थ्य सेवा पाएपछि स्वास्थ्य अवस्था प्रतिको डर, त्रास पनि कम भएको सेराजुनको भनाइ थियो ।
डुडुवामा सुरक्षित मातृत्व कार्यक्रमअन्तर्गत आमा र नवजात शिशुलाई घरदैलोमा सेवा दिन गाउँपालिका अध्यक्ष नरेन्द्र चौधरीले बताउनु भयो । आधारभूत मातृ शिशु स्याहार कार्यक्रममार्फत मातृ मृत्युदर न्यूनीकरणमा पालिका सक्रिय भएको छ । नवजात शिशु र आमाको स्वास्थ्य अवस्था बुझ्न सुत्केरीको घरघरमा स्वास्थ्यकर्मी पुग्दा सेवा निकै प्रभावकारी भइरहेको अध्यक्ष चौधरीले बताउनु भयो।
