कर्णाली । कर्णाली प्रदेश सरकारका मुख्यमन्त्री यामलाल कँडेलले प्रदेश अस्पताल सुर्खेतमा जडान गरिएको एमआरआई मेसिनको उद्घाटन गर्नुभएको छ ।
प्रदेश अस्पताल जडित थ्री टेस्ला ६४ च्यानलको अत्याधुनिक एमआरआई मेसिनको आज उद्घाटन गर्दै मुख्यमन्त्री कँडेलले उच्च प्रविधिको सेवा प्रवाहले कर्णालीवासीले बाहिर गएर महङ्गो खर्च गर्नुपर्ने दिनको अन्त्य भएको बताउनुभयो । उहाँले भन्नुभयो, “उच्चस्तर र गुणस्तरीय सेवा प्रदेश अस्पतालमा उपलब्ध छ यद्यपि सरल, सहज र विश्वासिलो हुनेगरी सेवा दिनुस् । अस्पतालको सेवा फलदायी बनाउने कुरामा प्रदेश सरकार साथमा छ ।”
कर्णाली प्रदेश अस्पताल सुर्खेत प्रदेशको गौरवको स्वास्थ्य संस्था भएको जनाउँदै मुख्यमन्त्री कँडेलले सबैको प्राथमिकतामा परेका कारण प्रदेश अस्पताल यो ठाउँमा आईपुगेको तर्क गर्नुभयो ।
“प्रदेश अस्पताल आइपुग्नु भएका नेतृत्वसहित स्वास्थ्यकर्मी, कर्मचारीको अथक मेहिनत छ तर पनि कहिलेकाही काबुभन्दा बाहिरको कुरा आउँदा तपाईंलाई सामान्य लागे सेवाग्रहीका लागि पहिलो र अन्तिम हुँदो रहेछ”, मुख्यमन्त्री कँडेलले भन्नुभयो, “अनुभूति दिलाउने गरी सेवा दिने कुरामा ध्यान दिन आग्रह गर्दछु ।” सेवाग्रहीहरूसँग मानवीय व्यवहार देखाउन अनुरोध गर्दै उहाँले काम गर्नका लागि सम्हालिएर बोल्नुपर्ने अवस्था रहेको बताउनुभयो ।
सामाजिक विकासमन्त्री घनश्याम भण्डारीले उच्च प्रविधि र गुणस्तरीय सेवा प्रवाहले कर्णालीवासीलाई प्रदेश बाहिर जानुपर्ने बाध्यता हटेको बताउनुभयो । “यसले बिरामीलाई आर्थिक भार कम हुनेछ,” उहाँले भन्नुभयो, “मेसिन खरिद भयो तर सञ्चालन र मर्मतमा ध्यान दिनुहोला ।” नागरिक सेवा प्रवाहमा सहजता प्रदान गर्न उहाँले अस्पताल प्रशासनलाई सुझाउनुभयो ।
अस्पतालका निर्देशक प्राडा डम्बर खड्काले यो एमआरआई मेसिन नेपालकै उत्कृष्ट र अत्याधुनिक प्रविधिको भएको बताउनुभयो । सुर्खेतमै एमआरआई मेसिनबाट उपचार सेवा सुरु भएपछि महँगो खर्च गरेर सुर्खेतबाहिर जानुपर्ने बाध्यता हटेको उहाँले भन्नुभयो । निर्देशक खड्काले भन्नुभयो, “यो मेसिनबाट दैनिक आठ जनासम्म बिरामीको उपचार हुँदै आएको छ । दैनिक २५–३५ जनालाई जाँच गर्न सकिने यो मेसिन आर्टिफिसियल इन्टेलिजेन्ससहितको आवाजविहीन उच्च गुणस्तरको छ । आवश्यक परेको खण्डमा चौबिसै घण्टा सेवा दिन अस्पताल तयार छ ।”
उहाँका अनुसार देशका अन्य अस्पतालमा एमआरआई सेवा लिएका बिरामीको रिपोर्ट आउन करिब एक हप्ता लाग्छ तर प्रदेश अस्पताल सुर्खेतमा भने एकै दिनमा रिपोर्ट दिन चिकित्सक सक्षम भएका छन् । सङ्घीय स्वास्थ्य तथा जनसङ्ख्या मन्त्रालयले उपब्लध गराएको उक्त मेसिनको लागत करिब रु ३० करोड रहेको छ । रासस
