वागमती श्रेष्ठ , भरतपुर । पछिल्लोसमय सर्ने भन्दा नसर्ने रोगहरुको प्रभाव विरामीहरुमा धेरै संख्यामा देखिन थालेको विज्ञहरुको भनाइ छ । ”विश्वव्यापी स्वास्थ्य सशक्तिकरण” भन्ने नारासहित विश्व मधुमेह दिवस – २४ को अवसरमा बिहीबार भरतपुरमा मधुमेह : परिवेश, भ्रम र यथार्थ विषयक अन्तरक्रिया कार्यक्रममा सम्पन्न भयो ।
रोटरी क्लब अफ चितवन, पुष्पाञ्जली हस्पिटल प्रा. लि.,पुष्पाञ्जली मधुमेह स्वयंसेवक समाज र मधुमेह समाज चितवनले संयुक्तरूपमा कार्यक्रमको आयोजना गरेका हुन् ।
अन्तरक्रिया कार्यक्रममा प्रमुख वक्ताकोरुपमा वरिष्ठ मुटुरोग विशेषज्ञ प्रा.डा.राजेन्द्र प्रसाद कोजुले मुटुरोग र मधुमेह रोगको सम्बन्ध,वरिष्ठ चिकित्सक प्रा.डा.बुद्धि बहादुर थापाले आफ्नो ४ दशकको स्वास्थ्य क्षेत्रको कार्यअनुभव प्रस्तुत गर्नुभएको थियो । साथै वरिष्ठ फिजिसियन डा.भोजराज अधिकारीले मधुमेहरोगप्रति आमनागरिक र विरामीहरुको भ्रम र यथार्थका विषयलाई सहजीकरण गरिदिनु भएको थियो । भरतपुर महानगरपालिकाका जनस्वास्थ्य अधिकृत केशव भट्टले मधुमेह र जनस्वास्थ्यको सम्बन्धबारे संस्थागत अनुसन्धानमुलक
प्रस्तुति राख्नुभएको थियो ।
कार्यक्रम संयोजक रहनुभएका डा.अधिकारीको अध्यक्षतामा संचालित कार्यक्रममा विशिष्ठ अतिथि मदन भण्डारी स्वास्थ्य विज्ञान प्रतिष्ठानका उपकुलपति डा.प्रदीप ज्ञवालीले यसखाले कार्यक्रमले सबै नागरिकलाई प्रभावकारी रहने हुदाँ गाउँ र स्वास्थ्य सेवामा पछिपरेका समुदायमा बसोवास गर्ने नागरिसम्म यसरी विषय विज्ञ मार्फत सचेतना दिनसकेमा दिर्घरोगबाट हुने असरलाई रोकथाम गर्न सहज हुने बताउनु भयो । कार्यक्रममा मधुमेह समाज चितवनका अध्यक्ष केशव देवकोटा र रोटरी क्लब अफ चितवनका अध्यक्ष भानु शर्मा, लगायतले मन्तव्य राख्नु भएको थियो । संसारभर करिब ५० करोडबेसी मधुमेहबाट प्रभावित विरामीहरु रहेको चिकित्सकहरुको भनाइ छ ।
