मौलाकालिका अस्पतालको सेवा नयाँ भवनबाट

भरतपुर । मेडिकल सिटी भरतपुरस्थित मौलाकालिका अस्पताल प्रा.लि.ले आफ्नो सेवा नयाँ भवनबाट शुभारम्भ गरेको छ।

अस्पतालले नवनिर्मित भवनबाट सेवा सुरु गरेको अवसरमा बहिरङ सेवा (ओपिडी) मा निःशुल्क र अन्य सेवामा ५० प्रतिशत छुटको घोषणा गरेको छ ।

भरतपुर महानगरपालिका–१० एयरपोर्ट नजिक रहेको अस्पतालले सोमबारदेखि आफ्नै नयाँ भवनबाट सेवा दिन लागेको हो । भरतपुर महानगरपालिका–११ बाइपास रोडमा रु ३५ करोडको लागतमा निर्माण गरिएको ६ तले सुविधासम्पन्न अत्याधुनिक भवनबाट सेवा सुरु गर्न लागेको अस्पतालका अध्यक्ष वरिष्ठ चिकित्सक डा.माणिकलाल मानन्धरले बताउनु भयो ।

आज अस्पतालले आयोजना गरेको पत्रकार सम्मेलनमा उहाँले स्वास्थ्यसम्बन्धी कार्यक्रम सञ्चालनका लागि अस्पताललाई एकसय शय्यासहित आफ्नै भवन अनिवार्य हुनुपर्ने भएकाले नयाँ भवन निर्माण गरेको बताउनुभयो । पत्रकार सम्मेलनमा अस्पतालका प्रबन्ध निर्देशक वरिष्ट चिकित्सक डा.केशवराज भुर्तेलले नयाँ भवनबाट आकस्मिक सेवासहित सबै खालका सेवा दिन लागिएको बताउनुभयो ।

पछिल्लो समय नेपाल सरकारको स्वास्थ्य बीमा कार्यक्रमप्रति बिरामीको चाप बढी रहेको र निजी क्षेत्रबाट सञ्चालित स्वास्थ्य संस्थाहरुले आर्थिक समस्या भोगी रहेको अवस्थामा यसरी प्राइभेट अस्पताल थप प्रविधिमैत्री बनाउँदै बिरामीको सेवामा अगाडि बढ्नु खुसीको कुरा हो।