चितवन । भरतपुर महानगरपालिका वडा नम्बर १० का बासिन्दालाई अस्पताल सम्म आउन र अस्पतालबाट घर फर्कनका लागि निःशुल्क एम्बुलेन्स सेवाका साथै कसैको मृत्यु भएमा शवबहान सेवा पनि पाउने भएका छन । वडा कार्यालयले आफ्नो वडा भित्र रहेका बिभिन्न पाँच वटा संस्था संग निःशुल्क एम्बुलेन्स सेवाको सम्झौता गरेको हो ।
मंगलबार कार्यालयमा वडा अध्यक्ष परमेश्वर खनाल र एम्बुलेन्स संञ्चालन गर्ने संस्थाहरुका प्रतिनिधिहरुले सम्झौता पत्रमा हस्ताक्षर गर्नुभएको थियो । टेक प्रसाद अर्यालय स्मिृत प्रतिष्ठान, टोपनारायण ढकाल स्मृति समाज, देवी प्रसाद वस्ती स्मृति प्रतिष्ठान, सामुदायिक स्वास्थ्य एवं अनुसन्धान केन्द्र र गुणराज पाठक स्मृति प्रतिष्ठानका प्रतिनिधिहरुले वडाका स्थायी तथा अस्थायी बासिन्दाहरुलाई आकस्मिक सेवाका लागि निःशुल्क सेवा दिने गरी सम्झौता गरिएको हो ।
वडाबासिलाई चौबिसै घण्टा सेवा दिने गरी यो सम्झौता गरिएका अध्यक्ष खनालले जानकारी दिनुभयो । आकाश्मिक रुपमा अस्पतालमा लैजान साधन नपाएर उपचार अभाव नहोस भनेर सम्झौता गरिएको उहाँले बताउनुभयो । साथै आर्थिक अभावमा शवको दाहासंस्कार गर्न समस्या पर्ने परिवारको लागि निःशुल्क शवबहान सेवा दिईएको उहांँले जानकारी दिनुभयो ।
यो सम्झौता बि. सं. २०८४ साल चैत ३० गते सम्म कायम रहने उहाँले बताउनुभयो । एम्बुलेसको प्रयोग बहिरंग सेवाका बिरामीहरुले गर्न नपाउने सम्झौतामा लेखिएको छ । अध्यक्ष खनालले वडा कार्यालयमा आफ्नो नेतृत्वमा आए संगै वडा बासीका लागि जिल्लाका दुई ठूला मेडिकल संग ५० प्रतिशत छुट, अन्य साना अस्पतालमा २० देखि ३० प्रतिशत छुट, गरिब तथा जेहन्दार बिद्यार्थीका लागि निःशुल्क शिक्षा लगायतका कामहरु भइसकेका छन ।
