चितवन । भरतपुर ८ को आयोजना तथा आमा बच्चा स्वास्थ्य नेपालको समन्वय र मनकामना अस्पतालको प्राविधिक सहयोगमा दुईदिने मनोसामाजिक परामर्श तथा सचेतना कार्यक्रम सम्पन्न भएको छ ।
आमा बच्चा स्वास्थ्य नेपालकी अध्यक्ष कविता खतिवडाको अध्यक्षतामा भएको कार्यक्रममा भरतपुर ८ का वडाध्यक्ष पूर्ण बहादुर रानाभाटको प्रमुख आतिथ्यता रहेको थियो ।
कार्यक्रममा बोल्नुहुँदै रानाभाटले समाजमा मनोसामाजिक परामर्शको खाँचो भएर नै वडाले यो अभियान अगाडि बढाएको बताउनुभयो ।
घर परिवार तथा समाजमा उत्पन्न विभेद आदिका कारण यस्ता खालका समस्या देखिने हुँदा यसको निराकरणमा वडाको प्रमुख भूमिका रहने बताउनु भयो ।
आगामी दिनहरुमा समेत वडाबासी सबैलाई मनोपरामर्श तालीम प्रदान गराउने आफ्नो लक्ष्य रहेको उहांँले बताउनुभयो ।
मनकामना अस्पतालका अध्यक्ष ध्रुव प्रसाद काफ्लेले बिरामीको उपचार सेवामा मनकामना अस्पताल सधैं तयारी रहेको बताउनुभयो ।
मानसिक स्वास्थ्य समस्यालाई हल गर्दै त्यस्ता बिरामीहरुको उपचारमा थप सहुलियतपूर्ण व्यवस्था गर्ने समेत बताउनुभयो ।
अस्पतालले हालसम्म थुप्रै सेवाहरु दिदै आएको जानकारी दिंँदै उहाँले सबै किसिमका रोगको उपचारमा केही छुटको प्रबन्ध समेत अस्पतालले मिलाउने प्रतिबद्धता व्यक्त गर्नुभयो ।
कार्यक्रममा सहभागीहरुलाई मानसिक समस्या , यसको लक्षण, उपचार विधी लगायतका विषयमा नीलु अर्याल र प्रतिमा अधिकारीले अभिमुखीकरण गर्नुभएको थियो ।
त्यस्तै आमा बच्चा स्वास्थ्य नेपालकी अध्यक्ष कविता खतिवडाले समाजमा आत्महत्याको संख्यामा वृद्धि भएको बताउंँदै उहाँले यसको निदान भनेकै मनोपरामर्श भएको बताउनुभयो ।
पारिवारिक रहनसहन, खानपिन, बिलासी जीवनयापन, कलह, बिभेद आदिकै कारण यस्ता समस्या समाजमा सिर्जित हुँदै गएको खतिवडाले तर्क गर्नुभयो ।
मानसिक समस्यामा परेकाहरुको व्यक्तिहरुको उद्घारमा जोड दिन सबैजना मिलेर लाग्नुपर्ने धारणा राख्नुभयो ।
आम मानिसमा चौबिस सेकेन्ड भित्र आउने खराब सोचका कारण यस्तो समस्या सिर्जित हुने हुँदा उहाँले सकारात्मक सोचको बिकास गर्न सबैमा आह्वान गर्नुभयो ।
आफूमा भएका कमीकमजोरीहरुलाई औल्याउँदै सुधार गर्नुपर्ने बताउनुभयो ।
मनकामना अस्पतालको सभाहलमा भएको सो कार्यक्रममा झन्डै ३० जना वडाबासीहरुको सहभागीता रहेको थियो ।
