मदन भण्डारी स्वास्थ्य विज्ञान प्रतिष्ठान प्रदेशकै गौरवको संस्था हो : मुख्यमन्त्री जम्कट्टेल

हेटौँडा ।बागमती प्रदेशका मुख्यमन्त्री एवं मदन भण्डारी स्वास्थ्य विज्ञान प्रतिष्ठानका कुलपति शालिकराम जम्मकट्टेलले प्रतिष्ठानलाई प्रदेशको गौरवको आयोजनाका रुपमा अगाडि बढाउने बताउनुभएको छ ।

प्रतिष्ठानको तेस्रो वार्षिकोत्सको आज उद्घाटन गर्दै उहाँले राज्यको लगानीमा जनताका छोराछोरीलाई चिकित्सा अध्ययन गराउन र स्वास्थ्य सेवामा पहुँच वृद्धि गराउनका लागि विषेश महत्त्व राख्ने प्रतिष्ठानलाई प्रदेश सरकारले गौरवको संस्थाका रुपमा विकास गर्ने बताउनुभयो ।

मुख्यमन्त्री जम्मकट्टेलले भन्नुभयो, “म आफू कानुनमन्त्री रहेको समयमा कानुन निर्माण गरेर स्थापना गरेको प्रतिष्ठानलाई प्रदेश सरकारले विषेश महत्त्वका साथ हेरेको छ, यसले जनताको छोराछोरीलाई चिकित्सा क्षेत्रमा ल्याउन र विपन्न वर्गलाई स्वास्थ्य सुविधामा पहुँच बढाउन मद्दत गरेको छ ।”

प्रतिष्ठानबाट सञ्चालित अस्पतालको विवादलाई समाधान गर्नेभन्दा पनि चर्काउने काम गर्नेको सङ्ख्या बढी भएकाले भने थप समस्या भएको उहाँको भनाइ छ । मुख्यमन्त्री जम्मकट्टेलले अर्को अस्पताल निर्माण नहुञ्जेलसम्मका लागि हेटौँडा अस्पताल प्रतिष्ठान मातहत रहने स्पष्ट पार्नुभयो । सङ्घीयता कार्यान्वयन गर्ने चरणमा प्रतिष्ठान निर्माण भएको बताउँदै उहाँले प्रतिष्ठानलाई कमजोर बन्न नदिने प्रतिबद्धता व्यक्त गर्नुभयो ।

प्रतिष्ठानका संस्थापक कुलपति तथा प्रदेशका प्रथम मुख्यमन्त्री डोरमणि पौडेलले प्रतिष्ठानले सञ्चालन गरेको हेटौँडा अस्पताल अहिले जिल्लाको मात्र नभएर प्रदेशको गौरवको आयोजनाका रुपमा काम गरिरहेको बताउनुभयो । अस्पतालको राम्रो काम केही व्यक्तिलाई पाच्य नहुँदा थप समस्या भएको उहाँको टिप्पणी थियो ।

कार्यक्रममा बागमती प्रदेशका स्वास्थ्यमन्त्री उत्तम जोशीले प्रदेश सरकारको गौरवको आयोजनाअन्तरगत अस्पताल रहेको बताउनुभयो । प्रदेश राजधानी हेटौँडामा मेडिकल सिटीका रुपमा प्रतिष्ठान रहेको बताउँदै उहाँले प्रतिष्ठानका लागि आवश्यक बजेट उपलब्ध गराउनका लागि प्रदेश सरकार तयार रहेको जनाउनुभयो । प्रतिष्ठानका लागि छुट्टै अस्पताल खोल्नका सरकार तयार रहेको उहाँको भनाइ छ ।

प्रतिष्ठानका उपकुलपति प्राध्यापक डाक्टर विश्वराज जोशीको अध्यक्षतामा भएको कार्यक्रममा प्रदेशका सामाजिक विकासमन्त्री कुमारी मुक्तान, प्रदेशसभाका सदस्य मधुसुधन पौडेल, रामेश्वर श्रेष्ठ, एकालाल श्रेष्ठ, प्रेमबहादुर पुलामी, जिल्ला समन्वय समिति मकवानपुरका प्रमुख ललित घलानलगायतले प्रतिष्ठानको प्रगतिको कामना गर्नुभयो । रासस