विकट पहाडी क्षेत्र कान्दामा स्वास्थ्य चौकी निर्माण

चितवन । राप्ती नगरपालिकाको सबैभन्दा विकट पहाडी क्षेत्र कान्दामा आधारभूत स्वास्थ्यकेन्द्र भवन निर्माण भएको छ । भवन निर्माण सम्पन्न भएसँगै छिट्टै सेवा सुरू गरिने नगरप्रमुख शमशेर लामाले जानकारी दिनुभयो । लामाका अनुसार भदौदेखि स्वास्थ्यकेन्द्र सञ्चालन गरिनेछ ।
गत वैशाख महिनामा पहिलोपटक नगरप्रमुख, उपप्रमुखसहितको टोली कान्दा पुगेको थियो । कान्दा पुगेर फर्किएलगत्तै बसेको कार्यपालिका बैठकले कान्दामा स्वास्थ्यकेन्द्र स्थापना गर्ने र कान्दा पुग्न ट्रयाक खोल्ने निर्णय गरेको प्रमुख लामाले बताउनु भयो ।

कान्दामा बाटो, बिजुली पुग्न सकेको छैन भने एउटा सिटामोलका लागि पनि कालिटार र यौरालिटार आउनुपर्ने बाध्यता छ । ‘सबै किसिमबाट कान्दा पछाडी छ, एउटा सिटामोलका लागि ४ घन्टा हिँड्नुपर्छ’, नगरप्रमुख लामाले भन्नुभयो , ‘कान्देली जनताको मुहारमा खुसी ल्याउने हाम्रो प्रयास छ, घरआँगनमा स्वास्थ्यसेवा पुगेसँगै उपचारमा थप सहज हुनेछ ।’
भवन निर्माण सम्पन्न भएसँगै अस्पतालमा आवश्यक उपकरण र जनशक्ति व्यवस्थापन गरेर केन्द्र सञ्चालन गरिने नगरपालिकाका स्वास्थ्य शाखा प्रमुख सुरेश न्यौपानेले बताउनु भयो । केन्द्रमा अहेब, अनमी र कार्यालय सहयोगीको व्यवस्था हुनेछ । संघीय सरकारको आर्थिक सहयोगमा भवन निर्माण सम्पन्न भएको हो ।
राप्तीको कान्दा पुग्न यातायातको सुविधा छैन । चार घन्टा हिँडेपछि उक्त ठाउँमा पुग्न सकिन्छ । चेपाङ बाहुल्य रहेको कान्दामा उपचार अभावमा धेरैले ज्यान गुमाउंँदै आएका छन ।