काठमाडौं । पहिलो पटक देशभरका ७४ कारागार कार्यालयमा रहेका कैदीबन्दीहरुको स्वास्थ्य अवस्था र त्यहाँ कार्यरत स्वास्थ्यकर्मीहरु सहितको केन्द्रीय कारागार अस्पतालको बार्षिक प्रगति प्रतिवेदन–२०८० सार्वजनिक गरिएको छ । केन्द्रीय कारागार अस्पतालको सभाहलमा आयोजित सार्वजनिकरण कार्यक्रममा प्रमुख अतिथि स्वास्थ्य सचिब डा रोशन पोख्ररेल र गृह सचिव दिनेश भट्टराईले सो प्रतिवेदन सार्वजनिकरण गर्नु भएको हो ।
उक्त कार्यक्रममा केन्द्रीय कारागार अस्पतालका प्रमुख मेडिकल सुपरिटेन्डेट डा. प्रकाश बुढाथोकीले अस्पतालको संक्षिप्त जानकारी संगै कार्यालयको प्रगति प्रतिवेदन बारेमा जानकारी गराउनुभएको थियो । बर्षभर करिब ३५ हजार कैैदीबन्दीहरुलाई बहिरंग , एक हजार बढीलाई अन्तरंग सेवा प्रदान गरिएको बताउदै अस्पतालको अझै गुणस्तरिय सेवा विस्तारमा भौतिक पुर्वाधार बाधक रहेको बताउनु भयो । थप शैया र विशिष्टिकृत सेवा विस्तार गर्न नसकेको कारण गत आर्थिक वर्षमा ६ हजार बढी कैदीबन्दी बिरामीलाई २३ वटा अस्पतालसंग संझौता गरी सेवा र उपचार गर्न परेको बताउनु भयो ।
कारागार व्यवस्थापन विभागका महानिर्देशक चक्रपाणी पाण्डेले कैदीबन्दीहरु सबै थुनुवा पुर्जीको आधारमा स्वास्थ्य विमा गर्ने गरि अघि बढेकोले सबै कैदीबन्दी तथा थुनुवालार्इृ स्वास्थ्य बिमाको दायरामा राखिने,सञ्चालित एक दिने मनोसामाजिक परामर्श अत्यन्त प्रभावकारी भएकाले यो आर्थिक वर्षमा पनि निरन्तरता दिने जानकारी दिनुभयो् ।
कार्यक्रमका प्रमुख अतिथि स्वास्थ्य सचिब डा. रोशन पोख्ररेलले गुमनाम रहेको अस्पताललाई डा. बुढाथोकी आएपछि व्यवस्थापकीय क्षेत्र सुधार भएको र अन्तरमन्त्रालय बिच समन्वय गर्न सफल भएको भन्दै आजैको कार्यक्रममा दुवै मन्त्रालयका सचिव र पदाधिकारी उपस्थिति गराउनसक्नु एक गतिलो उदाहरण भएको बताउनु भयो । राज्यले स्वास्थ्य क्षेत्रमा धेरै लगानी गरे पनि लक्षित वर्गसम्म सहजरुपमा सेवा पुग्न र पुर्याउन नसकेको बताउदै स्वास्थ्य बिमामा सवै कैदीबन्दीलाई आबद्ध गर्नसके मात्र उदेश्यउन्मुख हुने बताउनुभयो ।
सोहीक्रममा अर्का प्रमुख अतिथि गृह सचिव दिनेश भट्टराईले सिमित स्रोत ,साधन र जनशक्तिका बिच पनि अस्पतालले गरेका कार्यक्रमहरुको नजिकबाट निगरानी गरिरहेकोले कामको सराहाना गर्दै सधै सहयोग गर्ने प्रतिबद्धता व्यक्त गर्नुभयो । कार्यक्रममा गृह सचिव, स्वास्थ्य सचिव ,महानिर्देशक लगाएतका टोलीले अस्पतालमा सञ्चालित बहिरंग, अन्तरंग, बिशेषज्ञ सेवा, प्रयोगशाला, एम्बुलेन्स, फार्मेसी, स्तनपान कक्ष सहितका विभिन्न विभाग तथा कक्षहरुको निरिक्षण गर्नु भएको थियो ।
