मानसिक रोगको उपचार सेवा प्रभावकारी बनाउन स्वास्थ्यकर्मीलाई प्रशिक्षण

रसुवा ।मानसिक रोगको उपचार सेवा प्रभावकारी बनाउन रसुवामा कार्यरत स्वास्थ्यकर्मीलाई पहिलोपटक क्षमता अभिवृद्धि गरिएको छ ।

मानसिक रोगको लक्षण, त्यसबाट हुने असर, तत्काल दिनुपर्ने सेवाजस्ता समग्र विषयमा जिल्लाभित्र सञ्चालित सबै स्वास्थ्य संस्थाका एक–एक प्राविधिकलाई प्रशिक्षण दिइएको हो ।

यहाँ सेवारत सबै स्वास्थ्य संस्थामा कार्यरत १२ महिलासमेत २५ स्वास्थ्यकर्मीलाई प्रशिक्षण प्रदान गरिएको स्वास्थ्य प्रमुख भीमसागर गुरागाईंले जानकारी दिनुभयो । प्रशिक्षण पाउनेमा अस्पतालदेखि ग्रामीण एकाइसम्मका हेअ तथा अहेव दर्जाका प्राविधिक रहेको जनाइएको छ ।

स्वास्थ्य कार्यालय रसुवाको आयोजना, स्वास्थ्य सेवा विभाग इपिडिमियोलोजी तथा रोग नियन्त्रण महाशाखा टेकु काठमाडौँको सहकार्य र विश्व स्वास्थ्य सङ्गठन (डब्लुएचओ)को व्यवस्थापकीय सहयोगमा रसुवामा कार्यरत स्वास्थ्यकर्मीलाई प्रशिक्षण दिइएको हो ।

मानसिक रोग पहिचान तथा उपचार एवं परामर्शका विषयमा गोर्खा जिल्ला अस्पताल कार्यरत डा मानकाजी थापामगर, वीर अस्पतालमा कार्यरत डा रिकेश राउत र नुवाकोट जिल्ला अस्पतालमा कार्यरत डा सन्देश उपाध्यायले यहाँका स्वास्थ्यकर्मीलाई प्रशिक्षण दिनुभएको थियो । रासस