कालिकामा ज्येष्ठ नागरिकको घरमै गएर निःशुल्क स्वास्थ्य परिक्षण

चितवन । चितवनको कालिकामा ८० वर्षभन्दा माथिका घरमै गएर निःशुल्क स्वास्थ्य परिक्षण गरिएको छ । नगरपालिकाले नगरपालिका क्षेत्र भित्र रहेका करिव ६५० जना ज्येष्ठ नागरिकको घरदैलोमै पुगेर स्वास्थ्य परीक्षण एंव उपचार गर्ने हेतुले यो कार्यक्रम सुरु गरेको हो । नगरपालिका भित्रका १ देखि ११ वटै वडाका स्वास्थ्यकर्मीहरु घरघरमा प्रत्येक२÷२ महिनामा पुगेर ज्येष्ठ नागरिकको प्रेसर (उच्च रक्तचाप), सुगर ,चेकजाँच, पिसाबमा प्रोटिनको मात्रा, स्वास्थ्य परामर्श र औषधि वितरणका लागि कार्यक्रम सुरु गरिएको मेयर विनोद रेग्मीले जानकारी दिनुभयो ।

ज्येष्ठ नागरिक र विपन्न परिवारको निःशुल्क स्वास्थ्य बीमा भने नगरपालिकाले गरिदिएको छ । प्रत्येक घरघरमा स्वास्थ्यकर्मी पुगेर दिर्घरोगी पहिचान, उनीहरूको स्वास्थ्य अवस्था र औषधि सेवन बारे अनुगमन गरेको मेयर रेग्मीले बताउनु भयो ।नगरपालिकाले अभियानकै रुपमा स्वास्थ्य परीक्षण कार्यक्रम सञ्चालन गरिरहेको प्रमुख रेग्मीको भनाई छ । जटिल रोग भएका बिरामीहरुलाई नेपाल सरकारले निर्धारण गरेको मापदण्ड अनुसार नगरपालिकाको तर्फबाट सेवा सुविधा उपलब्ध गराउदै आएको प्रमुख रेग्मीले बताउनु भयो ।

कालिका नगरपालिकाका स्वास्थ्य शाखा प्रमुख दिपक भण्डारीले कार्यक्रम निकै प्रभावकारी भईरहेको बताउनु भयो ।“यो कार्यक्रममा रातो कार्ड पाएका र अपांगता भएका व्यक्तिहरुलाई समेटेका छौं, ५२ जना रातो पाएर अपागं भएका व्यक्ति छन् । प्रत्यक दुई दुई महिनामा करिव ६५० जनाको घरदैलोमा पुगेर यो कार्यक्रम गरिरहेका छौं ।” भण्डारीले भन्नुभयो ।

आधारभूत स्वास्थ्य सेवा स्थानीय तहको एकल अधिकार भित्र पर्ने भएकाले जेष्ठ नागरिक घरमै विरामी परेर बस्नु पर्ने अवस्थाई सुधार गर्नलाई यो अभियान सञ्चालन गरेको उहांँको भनाई छ ।