तनहुँ । विकोस क्लिनिक फाउण्डेशन अमेरिका र बन्दीपुर अस्पतालको संयुक्त आयोजनामा बन्दीपुरमा स्वास्थ्य शिविर सञ्चालन गरिएको छ ।
यही कात्तिक १६ गतेसम्म सञ्चालन हुने पाँच दिने बृहत् निःशुल्क स्वास्थ्य शिविरमा आजसम्म आठ सय बढीले स्वास्थ्य सेवा लिएका छन् । अमेरिकन डा निश्चेल सेचुस्टर, डा डेनिला गोमपेल लगायतका सात जना र शिक्षण अस्पताल काठमाडौँका डा नारायण महत्रा, डा अर्जुन श्रेष्ठ, डा प्रशान्त त्रिपाठी र डा रक्षा त्रिपाठी लगायतका चार गरी ११ जनाको टोली शिविरमा खटिएको जनाइएको छ ।
अमेरिकन डाक्टरले स्वास्थ्य मन्त्रालयबाट अनुमति लिई मेडिकल काउन्सिलबाट अस्थायी एनएमसी लिएर बन्दीपुर गाउँपालिका र बन्दीपुर अस्पतालको सहकार्यमा शिविर गरिएको सूचना अधिकारी रामप्रसाद भट्टराईले जानकारी दिनुभयो । विकोस क्लिनिक फाउण्डेशन अमेरिका संस्थाले सन् २००२ देखि बन्दीपुर क्षेत्रमा दुई वर्षको अन्तरालमा शिविर सञ्चालन गर्दै आएकाले यसवर्ष पनि निरन्तरता दिइएको बन्दीपुर अस्पतालले जनाएको छ ।
गाउँपालिकामा स्वास्थ्य शिविर आयोजना गरेपछि उपचारका लागि स्थानीयवासी उत्साहका साथ सहभागी भएको बन्दीपुर गाउँपालिका अध्यक्ष सुरेन्द्रबहादुर थापाले जानकारी दिनुभयो । अमेरिकन र नेपाली चिकित्सकले स्वास्थ्य परीक्षण गर्ने शिविरमा दैनिक नागरिकको भीड लाग्ने गरेको छ ।
जटिल रोगका उपचारका लागि पोखरा, चितवन, काठमाडौँलगायत शहरमा लामो दूरी धाउनुपर्ने बन्दीपुरवासीलाई सहज रुपमा स्वास्थ्य सेवा प्रदान गर्न शिविरको आयोजना गरिएको हो । शिविरमा आँखा, नाक, कान, घाँटी र प्रसूति रोग विशेषज्ञद्वारा स्वास्थ्य परीक्षण तथा औैषधि वितरण गरिएको छ ।
शिविरमा दैनिक दुई सय बढी नागरिक उपचारका लागि आउने गरेको बन्दीपुर स्वास्थ्य शाखाका प्रमुख अन्जिर भट्टराईले जानकारी दिनुभयो । आँखामा मोतिबिन्दुको समस्या देखिएमा दृष्टि अस्पताल पोखरामा कात्तिक १८ गते र जिल्लाकै भानु नगरपालिका–२ नारेश्वरटारमा मङ्सिर ७ गते निःशुल्क शल्यक्रियाको व्यवस्था रहेको छ ।
उक्त शिविरमा नाक, कान र घाँटीको शल्यक्रिया गर्नुपरेमा त्रिवि शिक्षण अस्पताल काठमाडौँमा निःशुल्क उपचारको व्यवस्था गरिएको छ । त्यसैगरी कात्तिक १२, १३, १४, १५ र १६ गते अमेरिकन तथा नेपाली विशेषज्ञ चिकित्सक जनरल फिजिसियनद्वारा स्वास्थ्य जाँच तथा निःशुल्क औषधि वितरण गरिने छ ।
गाउँपालिका कार्यालयले गाउँपालिकावासीको स्वास्थ्य उपचारका लागि प्राथमिकतामा राखेर काम गर्दै आएको गाउँपालिकाका प्रवक्ता शिवकुमार श्रेष्ठले जानकारी दिनुभयो । रासस
