‘स्वास्थ्य क्षेत्र सङ्घीयताको सफलतासँग जोडिएको छ’

तुलसीपुर । लुम्बिनी प्रदेशका कार्यवाहक मुख्यमन्त्री धनबहादुर मास्कीले स्वास्थ्य क्षेत्र सङ्घीयताको सफलतासँग जोडिएको विषय भएको बताउनुभएको छ ।

आर्थिक वर्ष २०७९/८० मा सम्पादित स्वास्थ्य कार्यक्रमको प्रदेशस्तरीय वार्षिक समीक्षामा मन्त्री मास्कीले स्वास्थ्यकर्मीहरूले सम्पादन गरेका कामले दिने परिणामले नै सङ्घीयताको सफलता र असफलतासँग जोडिने बताउनुभयो ।

“स्वास्थ्यकर्मीले सम्पादन गरेका परिणाम सङ्घीयताको सफलता र असफलतासँग जोडिएको हुन्छ”, मन्त्री मास्कीले भन्नुभयो, “यसलाई स्वास्थ्यकर्मीले ध्यान दिनुपर्छ । सुविधा लिन मात्रै यो क्षेत्रमा कार्यरत हुनुहुन्न, सेवा दिन यो पेसामा आउनुपर्छ ।”

बजेट विनियोजन भए पनि कार्यविधि निर्माणमा ढिलाइ गर्दा कार्यान्वयनमा समस्या हुने गरेको औंल्याउँदै मन्त्री मास्कीले पछिल्लो समय मानसिक बिरामीहरू बढिरहेकाले यसतर्फ पनि ध्यान दिनुपर्ने अवस्था रहेको बताउनुभयो ।

प्रदेशका स्वास्थ्यमन्त्री राजु खनालले प्रदेशको स्वास्थ्य अवस्था सुधार गर्नेतर्फ सरकार केन्द्रित भएको बताउनुभयो । रासस