बाँके । बर्दिया जिल्ला अस्पताल यस वर्ष पनि प्रदेश अस्पतालहरूमा पहिलो भएको छ । लुम्बिनी प्रदेश सरकारको आव २०७९/८० को प्रदेशस्तरीय मूल्याङ्कनमा जिल्ला अस्पताल बर्दिया पहिलो भएको हो ।
यस वर्षको प्रदेशस्तरीय वार्षिक समीक्षा कार्यक्रममा लुम्बिनी प्रदेश स्वास्थ्य मन्त्रालयका सचिव डाक्टर जनार्दन पन्थीले बर्दिया अस्पतालका प्रमुख डा. सुवास पाण्डेलाई पहिलो भएको प्रमाणपत्र प्रदान गर्नुभएको थियो ।
डा. पाण्डेले अनेक समस्याका बाबजुद बर्दिया अस्पताल प्रदेशमा पहिलो भएकोमा खुसी व्यक्त गर्नुभयो । ‘मूल्याङ्कन सुरु भएको चार वर्षमा तीन वर्ष हामी प्रथम भएका छौँ,’ उहाँले भन्नुभयो ।लगातार पहिलो दुई वर्ष हामी पहिलो भएका थियौँ, पोहोर दोस्रो भयौँ । यसपालि फेरि पहिलो हुन सफल भएका छौँ ।’
उहाँले पहिलो भएकोमा बर्दिया अस्पतालका सम्पूर्ण सहकर्मी चिकित्सक, नर्स तथा कर्मचारीहरूलाई धन्यवाद दिनुभयो।
चार वर्षदेखि प्रदेश सरकारले प्रदेशभरिका अस्पतालहरूको समीक्षा र मूल्याङ्कन गर्ने गरेको छ । मूल्याङ्कनको प्रमुख आधार उपचारको पूर्वतयारी (एनएसएस)लाई मान्ने गरिएको छ । त्यसैगरी, सेवाको सन्तुष्टि, समयमै डाटा रिपोर्टिङ, अपरेसनमा भएको वृद्धिलगायतलाई मूल्याङ्कनको आधार हुने गरेको डा. पाण्डेले बताउनुभयो।
प्रदेशका १३ वटा अस्पताललाई उछिन्दै यसपल्ट पनि बर्दिया अस्पताल पहिलो बन्न सफल भएको हो । मूल्याङ्कनमा बर्दिया अस्पतालले सय अङ्कमा सबैभन्दा बढी ७४ दशमलव ६१ अङ्क प्राप्त गर्न सफल भएको छ ।
त्यसैगरी दोस्रो भएको कपिलबस्तु अस्पतालले ७१।७६ अङ्क ल्याएको छ । तेस्रो स्थान रहेको लुम्बिनी प्रादेशिक अस्पतालले ७०।३६ अङ्क ल्याएको छ ।भने गुल्मी अस्पताल चौथो, भिम अस्पताल पाँचौँ, अर्घाखाँची अस्पताल छैटौँ, पृथ्वी चन्द्र अस्पताल सातौँ भएका छन् । यसैगरी राप्ती प्रादेशिक अस्पताल दाङ आठौँ, प्युठान अस्पताल नवौं, रामपुर अस्पताल ११ औँ, पाल्पा अस्पताल १२ औँ र रुकुम पूर्व अस्पताल तेह्रौँ भएको छ।
अस्पतालले प्रवाह गर्ने सेवाको स्तर, आर्थिक पारदर्शीता तथा सुशासन, नियमित रिपोर्टिङ लगायतका ११ वटा सूचकका आधारमा बर्दिया अस्पताल पहिलो हुन सफल भएको हो ।
