काठमाडौं । केन्द्रीय कारागार अस्पताल,जगन्नाथदेवलको आयोजना तथा विश्व स्वास्थ्य संगठन नेपालको सहयोगमा नसर्ने रोग र मानसिक स्वास्थ्य सम्बन्धी एकदिने सचेतनामुलक कार्यक्रम काठमाडौंमा सम्पन्न भएको छ ।
केन्द्रीय कारागार कार्यालय काठमाडौं अन्तर्गत रहेका केन्द्रीय बन्दीगृह, भद्र बन्दीगृह तथा महिला बन्दीगृहमा रहेका करिव ५०० जनाभन्दा वढी कैदीबन्दीहरुलाई एक समारोहका बीच नसर्ने रोगहरु, सुर्तीजन्य लतको प्रभाव र मानसिक स्वास्थ्यकाबारेमा कार्यक्रम आयोजना गरिएको हो ।
पछिल्लो समय नसर्ने रोगले वार्षिक मृत्युको ७० प्रतिशत भन्दा बढीले महामारीको रुप लिइरहेको अवस्थामा केन्द्रीय कारागार अस्पतालले देशभरका ७४ जिल्लामा रहेका ७७ कारागारका करिब ३० हजार कैदीबन्दीमा गरिएको सर्बेक्षणमा नसर्ने रोग र मानसिक स्वास्थ्य समस्या बढी देखिएको प्रमुख मेडिकल सुपरिटेन्डेन्ट डा.प्रकाश वुढाथोकीले बताउनु भयो ।
यी रोगहरुको रोकथाम निदान तथा उपचारको पहुच र निरन्तरताका लागि केन्द्रीय कारागारका प्रमुख डा.वुढाथोकीको पहलमा विश्व स्वास्थ्य संगठनका विशेषज्ञहरु डा.केदार मरहट्ठा,डा.लोनीम प्रसाई दीक्षित र डा.प्रकाश बुढाथोकीले सुधारगृहभित्र नै नसर्ने रोगहरु,मानसिकरोग,मधुमेहरोग, मुटुरोग,मृगौलारोग,सुर्तीजन्य पदार्थको अनुचित प्रयोग,मदिरा सेवन लगायतको प्रकोप, नियन्त्रण,रोकथाम साथै उपचारकाबारेमा कैदीवन्दीहरुलाई सचेतना दिनुभएको थियो । चिकित्सकहरुको भनाइ अनुसार यसखाले सचेतना कार्यक्रमबाट बन्दीगृहमा रहेका कैदीबन्दीहरुको जीवनशैली र स्वास्थ्यमा सकरात्मक प्रभाव पर्ने विश्वास गरिएको छ ।
