चितवनको खैरहनीमा घरघरमै सेवा दिन बा–आमा स्वास्थ्य कार्यक्रम

चितवन । पूर्वी चितवनको खैरहनी नगरपालिका वडा नं १३ कुमरोजमा बा –आमा स्वास्थ्य कार्यक्रमको शुभारम्भ गरिएको छ । आज आयोजित एक औपचारिक कार्यक्रमका बीच सो नगरपालिकाका मेयर शशीकुमार खनियाले कार्यक्रमको उद्घाटन गर्नुभयो ।

सो अबसरमा मेयर खनियाले ज्येष्ठ नागरिकको स्वास्थ्य रक्षाका लागि घरघरमै उपचार सेवा सुरु गरिएको बताउनु भयो । विशेष गरेर दीर्घरोग भएर औषधि सेवन गरिरहेका ६८ बर्ष माथीका बाआमाको स्वास्थ्यप्रति जिम्मेवार हुँदै स्वास्थ्यकर्मीलाई घरमै लगेर उपचार सुरु गरिएको उहांँको भनाई छ । सो कार्यक्रम सञ्चालनको लागि नगरपालिकाले कार्यविधि समेत बनाएको थियो ।

मेयर खनियाले नसर्ने रोगको जोखिम हुन नदिन नगरपालिकाले बा आमा स्वास्थ्य कार्यक्रम सुरु गरेको भन्दै ६८ वर्ष भन्दा मुनिका नगरवासीको स्वास्थ्य परीक्षण, प्रजनन स्वास्थ्य, पोषण लगायत कार्यक्रमलाई आवश्यकता अनुसार अघि बढाउने बताउनु भयो । उक्त कार्यक्रम अन्तर्गत ६८ वर्ष भन्दा माथि उमेर समुहका सवैको घरघरमा गएर सामान्य स्वास्थ्य परीक्षण, उच्चरक्तचाप, मधुमेह लगायतको परीक्षण गरिने नगरपालिकाका स्वास्थ्य शाखा प्रमुख भोजराज खनालले जानकारी दिनुभयो । १३ नम्बर वडा सकिएपछि लगतै अन्य वडामा पनि सो कार्यक्रम सञ्चालन गरिने छ ।

उक्त कार्यक्रममा सम्वन्धित वडामा रहेको स्वास्थ्य केन्द्रका स्वास्थ्यकर्मी खटिनेछन् । कार्यक्रममा प्रमुख प्रशासकीय अधिकृत विष्णुप्रसाद सापकोटाले स्थानीय सरकार नगरबासीको स्वास्थ्यप्रति सचेत हुँदै घरघरमै स्वास्थ्य उपचार कार्यक्रम सुरु गरिएको बताउनु भयो । वडा नं १३ का वडाध्यक्ष कुलप्रसाद भूषालले नगरपालिकाले सुरु गरेको कार्यक्रमलाई वडामा प्राथमिकताका साथ कार्यान्वयन गर्ने बताउनु भयो ।
स्थानीय सरकार नगरबासीको अभिभावक भएकाले स्वास्थ्यर्कीहरु घरमै पुगेर ज्येष्ठ नागरिकको उपचार गर्ने कामको सुरुवात गरिएको मेयर सापकोटाको भनाई छ ।