भरतपुरमा ३७ जनाले गरे रक्तदान, तिमिल्सिनाको ५५ पटकको रेकर्ड

भरतपुर । हिमाल युवा क्लब र उज्ज्वल दुग्ध उत्पादक सहकारी संघको संयुक्त आयोजनामा शनिबार रक्तदान कार्यक्रम सम्पन्न भएको छ । उक्त कार्यक्रममा ३४ पुरुष र ४ महिला गरेर ३७ जनाले रक्तदान गरेको क्लबका अध्यक्ष सन्जिव न्यौपानेले बताए ।
क्लबको भवन भरतपुर १३, पाखुरीचोकमा सम्पन्न कार्यक्रमको प्रमुख अतिथि भरतपुर १३ का वडा अध्यक्ष प्रकाश दवाडी रहेका थिए । उज्ज्वल दुग्ध उत्पादक सहकारीका अध्यक्ष होमनाथ सुवेदीले मेडिकल सिटीको रुपमा रहेको भरतपुरमा रगतको अभाव नहोस् भन्ने उद्धेश्यले सामाजिक उत्तरदायित्व अन्तर्गत रक्तदान कार्यक्रम आयोजना गर्दै आएको बताए ।

तिमिल्सिनाले गरे ५५ पटक रक्तदान

गीतानगरका भगिरथ तिमिल्सिनाले यस कार्यक्रममा रगत दिएसंगै उनको रक्तदानको रेकर्ड ५५ पटक पुगेको छ। केन्द्रीय दुग्ध सहकारी संघ लिमिटेड उपाध्यक्ष एवम् सहकारी अभियन्ता तिमिल्सिनाले शनिबार आफूले रगतदान गदैँ सो जानकारी गराएका हुन् ।

भरतपुर ६ को माओवादी केन्द्रको अध्यक्ष समेत रहेका तिमिल्सिनाले वि.सं. २०४५ सालमा पार्टीकै रक्तदान कार्यक्रममा १९ वर्षको उमेर हुदाँ पहिलो पटक रक्तदान गरेको बताउँछन् । पहिलो पटक रक्तदान गरेपछि नियमित रुपमा ३÷३ महिनामा रक्तदान गर्दै आएको छु, उनले भने, ‘१० वर्षे जनआन्दोलनका समयमा निरन्तर भएन यद्धपछि त्यो बाहेकका दिनमो ३ महिना कट्ना साथ आवश्यक परेकालाई अस्पतालमानै गएर वा रक्तदान भएको ठाउँमानै पुगेर रगत दिने गरेको छु ।’

मानव सेवा गर्नु पर्छ भन्ने हिसावले रक्तदान गर्न शुरु गरेपनि अहिले नियमित रक्तदान गर्ने बानी परेको तिमल्सिना बताउछन् । रगत दिदाँ मानिस स्वस्थ्य हुने रहेछ उनले भने, ‘मेरो उमेरका लाई विभिन्न रोग लागेको देखेको छु । रक्तदान नियमित भएकाले नै म स्वस्थ्य र निरोगी छु भन्ने ठानेको छु ।’