चिकित्सकलाई गुणस्तरीय सेवामा जुट्न स्वास्थ्य मन्त्री यादवको निर्देशन :

धनुषा । उपप्रधान एवं स्वास्थ्य तथा जनसंख्यामन्त्री उपेन्द्र यादवले चिकित्सकलाई प्रतिबद्धताका साथ गुणस्तरीय स्वास्थ्य सेवाका लागि जुट्न निर्देशन दिनु भएको छ । दक्ष जनशक्तिको प्रतिबद्धताले मात्र गुणस्तरीय स्वास्थ्य सेवा सम्भव रहेको उल्लेख गर्दै उहाँले चिकित्सकहरूलाई प्रतिबद्धताका साथ सेवामा समर्पित हुन निर्देशन दिनुभयो ।

मधेश स्वास्थ्य विज्ञान प्रतिष्ठान मातहतको प्रादेशिक अस्पताल जनकपुरधाममा नव निर्मित बर्थिङ्ग सेन्टरको शुक्रबार समुद्घाटन गर्दै उपप्रधानमन्त्री यादवले भौतिक संरचनाको निर्माण र प्राविधिक व्यवस्थापनले मात्र गुणस्तरीय स्वास्थ्य सेवा सम्भव नरहेको उल्लेख गर्नु भयो ।

मधेश प्रदेश छिट्टै स्वास्थ्यको क्षेत्रमा फड्को मार्ने विश्वास व्यक्त गर्दै उपप्रधानमन्त्री यादवले जनकपुर , राजविराज र वीरगन्जमा स्वास्थ्य क्षेत्रको ठूलो प्रोजेक्टमा काम भैरहेकोे उल्लेख्य गर्नुभयो ।

प्रतिष्ठानका उपकुलपति डा। अङ्कुर साहको अध्यक्षतामा भएको उक्त समारोहमा मधेश प्रदेशका स्वास्थ्य तथा जनसङ्ख्या मन्त्री शत्रुधन प्रसाद सिंह, ऊर्जा, खानेपानी तथा सिचाई मन्त्री सिंग्घासन साह कलवार, राज्यमन्त्री केशव राय चौधरी , सङ्घीय स्वास्थ्य सचिव रोशन पोखरेल , अमेरिकी राजदूत डिन आर थमसन, प्रदेशका स्वास्थ्य सचिव डा। प्रमोद यादव, प्रादेशिक अस्पतालका निर्देशक राम नरेश पण्डित सहितको सहभागिता रहेको थियो ।

यु एस इण्डो प्यासिफिक कमाण्ड र यु एस एम्बेसीको सहयोगमा करिब ६ करोडको लागतमा ७५ बेडको बर्थिङ्ग सेन्टर निर्माण गरिएको छ ।