दमौली, नेपाल निजामती कर्मचारी सङ्गठनका केन्द्रीय सदस्य रामचन्द्र पण्डितको मिर्गौला उपचारका लागि सहयोग रकम जुट्ने क्रम सुरु भएको छ । दुवै मिर्गौला फेल भई मिर्गौला प्रत्यारोपणको तयारीमा रहेका दमौली निवासी पण्डितको उपचारमा सहयोग जुट्न थालेको हो ।
तनहुँ र कास्कीका विभिन्न कार्यालयका कर्मचारीबाट पण्डितको उपचारका लागि रकम जुटेको सङ्गठनका तनहुँ अध्यक्ष रुद्र ठकुरीले जानकारी दिनुभयो । जिल्ला भेटेरीनरी अस्पताल तथा पशु विज्ञ केन्द्र तनहुँका अधिकृत पण्डितको उपचारका लागि हालसम्म रु चार लाख नौ हजार १८० सङ्कलन भएको छ ।
पण्डितको उपचारका लागि निजामती कर्मचारी सङ्गठन तनहुँबाट रु ५० हजार ८४५, निजामती कर्मचारी सङ्गठन कास्कीबाट रु एक लाख ९५ हजार, मालपोत कार्यालय तनहुँबाट रु ३१ हजार ५००, कृषि ज्ञान केन्द्र तनहुँबाट रु २८ हजार, म्याग्दे गाउँपालिकाबाट रु २१ हजार ६३५ र खानेपानी तथा सरसफाइ डिभिजन कार्यालय तनहुँबाट रु ८२ हजार ७०० सङ्कलन भएको छ । पण्डितको उपचारका लागि कार्यालय प्रमुखदेखि कार्यालय सहयोगीसम्मले सहयोग गरेका छन् । निजामती कर्मचारी सङ्गठनले पण्डितको उपचारमा सहयोग गर्न सबैसँग अपिल गरेको छ ।
कलकत्तास्थित अस्पतालमा पण्डितको मिर्गौला प्रत्यारोपणको तयारी गरिएको र आर्थिक स्रोत अभाव भएपछि सबैसँग सहयोगको अपिल गरिएको ठकुरीले जानकारी दिनुभयो । सहयोगका लागि निजामती कर्मचारी सङ्गठन तनहुँको नाममा राष्ट्रिय वाणिज्य बैंकमा रहेको खाता नम्बर ३५२०१०००००४६३००१ वा माछापुच्छ्रे बैंकमा रामचन्द्र पण्डितको नाममा रहेको खाता नम्बर १२३६५२४१११३३९०११ मा रकम जम्मा गर्न सकिनेछ ।
