काठमाडौँ, । अछामको मंगलसेन नगरपालिकामा आयोजित शिविरमा पांँचसय बढी मुटुको परीक्षण गरिएको छ ।
नेपाल हृदयरोग निवारण प्रतिष्ठान र रोटरी क्लव अफ पाटनको संयुक्त आयोजनामा आइतबार अछामको मंगलसेनमा निशुल्क मुटु स्वास्थ्य शिविर सञ्चालन गरिएको हो ।
स्वास्थ्य कार्यालय र जिल्ला अस्पताल अछामको सहयोग रहेको उक्त शिविरमा ५०० बढीले मुटु जाँच गएिको वरिष्ठ मुटुरोग बिशेषज्ञ डा. प्रकाशराज रेग्मीले जानकारी दिनुभयो । त्यसमध्ये २५० जनाको ईको र ३०० जनाको इसीजी गरिएको थियो ।
उहांँका अनुसार आइतबार गरिएको शिविरमा ७ जनाको तत्कालै शल्यक्रिया गर्नु पर्ने देखिएको र उनीहरुलाई काठमाडौँस्थित शहीद गंगालाल हृदय केन्द्रमा रिफर गरिएको छ । विभिन्न जिल्लामा पुगेर आम सर्वसाधारणको मुटु परीक्षणमा गर्दै आइरहेको नेपाल हृदयरोग प्रतिष्ठानसंग रोटरीक्लव अफ पाटन सहकार्य गर्दै आएको छ । सोही अनुसार यी दुई संस्थाले यसपटक सुदूरपश्चिमको अछाम बझाङ र बाजुरा गरी तीन जिल्ला पुगेर निशुल्क मुटु स्वास्थ्य शिविर गर्ने योजना बनाएका हुन् ।
सुदूरपश्चिमका स्थानीय तथा स्कुले बालबालिकाहरुको मुटु परीक्षण तथा उपचारमा सहयोग गर्ने उद्धेश्य सहित काठमाडौँबाट ७ जना विशेषज्ञ चिकित्सक, ८ जना प्राविधिक र ७ जना स्वयंसेवी सहित कुल २२ जनाको टोली आएको थियो । उहांँ ले परीक्षण क्रममा उच्च रक्तचाप, मधुमेह तथा बाथमुटुरोगको समस्या भएका धेरै व्यक्ति भेटिएको बताउनु भयो ।
सुदूरपश्चिम शिविरका लागि काठमाडौँबाट डा रेग्मीको नेतृत्वमा मुटुरोग विशेषज्ञहरु डा राजेन्द्र कोजु, डा आरके साह, डा उर्मिला शाक्य, डा प्रेमराज बैद्य, डा सत्यनारायण सुवाल र डा अच्युतानन्दलाल कर्ण सहितको टोली त्यसतर्फ गएको थियो ।
उक्त टोलीको नेतृत्वमा आइतबार दिनभर मंगलसेनमा आम सर्वसाधारणको मुटु परीक्षण तथा उपचार गरिएको हो । टोलीले बझाङ र बाजुराका विभिन्न स्थानमा पुगेर यस्तै शिविर तथा स्क्रिनिङ कार्यक्रम रहेको जानकारी दिएको छ ।
