क्यान्सर अस्पतालमा अत्यधुनिक थुलियम फाइबर लेजरद्वारा युरोलोजी सर्जरी सेवा शुरु

चितवन । बिपी कोइराला मेमोरियल क्यान्सर अस्पताल भरतपुरमा अत्यधुनिक थुलियम फाइबर लेजर मेसिन( टिएफएल) द्वारा युरोलोजी सर्जरी सेवा शुरु गरिएको छ ।
अस्पतालका उपनिर्देशक एवं युरोलोजिष्ट डा उमेश नेपालले इण्डोयुरोलोजी सेवाको पछिल्लो प्रविधि (लेटेस्ट टेक्नोलोजी) भएकाले सेवाको समयसापेक्ष स्तरोन्नति हुने बताउनुभयो । यसअघि युरोलोजीमा प्रयोग हुने लेजरहरु होल्मियम लेजरको पल्स एमल्सन हुने हुनाले टिस्यू च्यातिने सम्भावना (टिस्यू टिएरिङ इफेक्ट) प्रविधिबाट सर्जरी हुंँदै आएको थियो । उहाँले यस टिएफएल प्रविधिबाट निरन्तर बीममा निस्किने र टिस्यु च्यातिने समस्या नहुने जानकारी दिनुभयो । उहांँका अनुसार यो प्रविधिबाट शल्यक्रिया गर्दा रक्तश्राव अति नै न्यून हुन्छ । टिस्यू पेनिट्रेसन सबैभन्दा कम हुने रे जोखिम दर अति नै न्यून हुन्छ ।
अस्पतालमा प्रत्येक वर्ष चार सय ५० हाराहारी पिसाब थैलीका क्यान्सर र एक सय हाराहारी प्रोस्टेट क्यान्सरको शल्यक्रिया हुंँदै आएको छ । यस्ता बिरामीका लागि यो प्रविधि निकै लाभदायी हुने उहांँले बताउनुभयो । ‘एन ब्लक रिसेक्सन गर्न मिल्ने भएकाले पुनःशल्यक्रिया गर्नुपर्ने सम्भावना पनि न्यून हुन्छ ।” मेसिन जडान गरेसँगै शुक्रबार पहिलो दिन तीन वटा शल्यक्रिया गरिएको छ ।’ उहाँले भन्नुभयो ।
अस्पतालका कार्यकारी निर्देशक डा शिवजी पौडेलले आधुनिक उपकरणहरु भित्रयाएर सेवालाई चुस्तदुरुस्त र सेवालाई प्रभावकारी बनाउंँदै लगिएको बताउनु भयो । अस्पतालमा देशभर र भारतीय सीमा क्षेत्रबाट बिरामी उपचारका लागि आउने गर्दछन ।