सुदूरपश्चिम । सुदूरपश्चिम प्रदेशका सामाजिक विकासमन्त्री लालबहादुर खड्काले सुदूरपश्चिम प्रदेश सरकारले यहाँको स्वास्थ्य सेवा सुधार र वृद्धि गर्दै लगेको बताउनुभएको छ । कञ्चनपुरको शुक्लाफाँटा नगरपालिका–४ मा आज आयोजित निःशुल्क स्वास्थ्यशिविर उद्घाटन समारोहमा मन्त्री खड्काले प्रदेश सरकारले चालु वर्षलाई स्वास्थ्य सुधार वर्षका रुपमा अगाडि बढाएको जानकारी दिनुभयो ।
यहाँको सेती प्रादेशिक अस्पताल ३००, महाकाली प्रादेशिक अस्पताल २०० र टीकापुर अस्पताललाई १०० शय्यामा स्तरोन्नति गरिरहेको बताउँदै मन्त्री खड्काले पहाडी जिल्लामा पनि अस्पतालको भौतिक संरचना र उपकरण लगायतका सुधार भएको जानकारी दिनुभयो । “ सेती र महाकाली अस्पतालमा डाइलोसिस मेसिन जडान हुदैछ”, उहाँले भन्नुभयो,“यहाँका सबै अस्पतालमा अक्सिजन प्लान्ट र सघन उपचार कक्ष सेवा विस्तार भएको छ ।”
