इलाम । राष्ट्रिय खोप कार्यक्रम अन्तर्गत इलामका कक्षा ६ देखि १० मा अध्ययनरत तथा विद्यालय बाहिर रहेका ९ वर्षदेखि १४ वर्षसम्मका छात्रालाई पाठेघरको मुखको क्यान्सर गराउने एचपिभी ह्युमन प्यापीलोमा भाइरस विरुद्धको खोप दिइने भएको छ । उक्त भाइरसविरुद्धको खोप कार्यक्रम सञ्चालनका लागि जिल्लाको सम्पूर्ण स्थानीय तहबाट तथ्याङ्क सङ्कलन कार्य सकिएको जिल्ला स्वास्थ्य कार्यालय इलामले जनाएको छ ।
देशव्यापी खोप कार्यक्रमअन्तर्गत आउँदो माघ २२ गतेदेखी फागुन ७ सम्म एकै पटक सञ्चालन हुनेछ भने इलाम जिल्लामा माघ २७ देखि २ गतेसम्म १० वटा पालिकामा एकै पटक रहेको छ । खोप केन्द्र सम्पुर्ण विद्यालय तथा स्वास्थ्य संस्थाहरू रहेका छन् । लक्षित सङ्ख्या कोशीमा २५९,८८१ इलाममा ९८२८ रहेको छ।
नेपालमा पाठेघरको क्यान्सरलाई निवारण गर्ने लक्ष्यका साथ सरकारले एचपीभी खोप अभियान २०८१/८२ सञ्चालन गर्ने निर्णय गरिसकेको छ । पाठेघरको मुखको क्यान्सरका कारण बढ्दै गएको अकाल मृत्युको जोखिमबाट जोगाउने उद्देश्यका साथ करिब १७ लाख किशोरीलाई खोप दिन लागिएको छ ।
नेपालमा हरेक वर्ष २,१६९ जना महिलालाई पाठेघरको मुखको क्यान्सर भएको र यसबाट हरेक वर्ष १,३१३ जना महिलाहरूको मृत्यु हुन्छ भन्ने अनुमान रहको छ । पाठेघरको मुखको क्यान्सर विश्वमा भने महिलाहरूमा हुने क्यान्सर मध्येमा चौथो मुख्य क्यान्सरको रुपमा रहेको छ । संसारमा हरेक वर्ष ५,७०,००० महिलालाई पाठेघरको मुखको क्यान्सर हुनेगरेको छ भने यो रोगबाट हरेक वर्ष ३,११,००० जना महिलाको मृत्यु हुने गरेको छ । विश्व स्वास्थ्य सङ्गठनको सन् २०२० को तथ्याङ्क अनुसार, संसारका ८८ प्रतिशत पाठेघरको मुखको क्यान्सरका बिरामीहरू तथा मृत्यु हुने सङ्ख्या न्यून र मध्यम आय भएका देशहरूमा देखिएको छ ।
