चितवन । नेपाल सरकारका उद्योग वाणिज्य तथा आपूर्ति मन्त्री दामोदर भण्डारीले ओम मेगाश्री फर्मास्युटिकल्सको अवलोकन गर्नु भएको छ । उहाँले विशेष प्राथमिकता दिई शनिबार भरतपुर महानगरपालिका २९ , स्थित जुगेडीमा रहेको ओम मेगाश्री उद्योगको अवलोकन गर्र्नुभएको हो ।
मन्त्री भण्डारीले फर्मास्युटिकल्सको उत्पादन कक्ष , क्वालिटी कन्ट्रोल, आरएनडी कक्षको अवलोकन गर्नुभएको थियो । अवलोकनपछि मन्त्री भण्डारीले गैरआवासीय नेपालीको लगानीमा सञ्चालन गरिएको ओम मेगाश्रीमा अन्तराष्ट्रिय स्तरको मेसिन, उत्कृष्ट भौतिक पूर्वाधार, औद्योगिक वातावरण रहेको बताउँदै यस उद्योगबाट उत्पादित औषधि अन्तर्राष्ट्रिय स्तरको रहनेमा विश्वास व्यक्त गर्नुभयो । अवलोकनको क्रममा उहाँले भन्नुभयो, “नेपाल सरकार गैरआवासीय नेपाली उद्योगी व्यवसायीहरुको लगानीप्रति उच्च सम्मान गर्दछ ।” उहाँले उद्योगको संरक्षणमा सरकार सदैव सकारात्मक रहने प्रतिवद्धता व्यक्त गर्दै सहयोगका लागि हातेमालो गर्न तयार रहेको समेत बताउनुभयो ।
सो क्रममा कम्पनीका अध्यक्ष अर्जुनकुमार श्रेष्ठले सवाअरब लगानीमा सुरु भएको यस कम्पनीले तीनसय थरीका औषधि सूचीकृत गरिसकेको र ३७ प्रकारका औषधि बजारमा उपलब्ध भैसकेको जानकारी दिनुभयो । अध्यक्ष श्रेष्ठले नेपाली औषधि उद्योगमानै पहिलोपटक ओम मेगाश्री फर्मास्युटिकल्स लिमिटेड आईपिओमा गएको बताउनु भयो । “ पहिलो चरणमा बैदेशिक रोजगारीमा रहेका नेपालीहरुका लागि लक्षित गर्दै आईपिओ जारी गरेका छौं,’उहाँले भन्नुभयो, दोस्रो चरणमा बिभिन्न क्षेत्रलाई समेटेर अगााडि बढ्ने कम्पनीको योजना छ ।”
यस उद्योगमा नेपाल बाणिज्य महासंघका पूर्व अध्यक्ष कुशकुमार जोशी ,गैरआवासीय नेपाली संघका उप – महासचिव सोम सापकोटा र सह– कोषाध्यक्ष कृष्ण तिमिल्सिना लगायतको टोली अवलोकनमा सहभागी हुनुहुन्थ्यो ।
