बागमती श्रेष्ठ
बुलिङटार । ग्रामीण क्षेत्रका जनतालाई स्वास्थ्य सचेतनासंगै विभिन्न रोगको सेवा प्रदान गर्ने उदेश्यले नवलपुर जिल्लाको पहाडी भेग बुलिङटार गाउँपालिकामा बृहत नि:शुल्क स्वास्थ्य शिविर सम्पन्न भएको छ । बुलिङटार गाउँपालिका नवलपुर तथा पुष्पाञ्जली हस्पिटल प्रा.लि.भरतपुरको सयुक्त आयोजनामा एकदिने बृहत नि:शुल्क स्वास्थ्य शिविर गरिएको हो ।
बुलिङटार गाउपालिका ३ नं. वडा कार्यालय प्राङ्गगढमा सञ्चालित शिविरमा वरिष्ठ फिजिसियन डा.भोजराज अधिकारी,स्त्री तथा प्रसूति रोग विशेषज्ञ डा.रामप्रसाद सापकोटा,बालरोग विषेशज्ञ डा.योगराज शर्मा, फिजिसियन डा.रिकेस सापकोटा ,नाक कान घाटी रोग विशेषज्ञ डा.लाल बहादुर गुरुङ, अर्थोपेडिक रेजिडेण्ट डा.विज्ञान भट्टराई, दन्तरोग विशेषज्ञ डा.बिवेक घिमिरे, डा.निश्चल शाह र बुलिङटार गाउपालिका प्राथमिक स्वास्थ्य केन्द्रकी प्रमुख डा.अमिसा अधिकारी सहित २ दर्जन स्वास्थ्यकर्मीको टिमले करिब २२४ जना विरामीलाई स्वास्थ्य सेवा प्रदान गरीएको पालिकाका स्वास्थ्य शाखा प्रमुख अशोक कुमार श्रेष्ठले जानकारी दिनुभयो ।
शिविरमा उच्च रक्तचाप,मधुमेह,पेटरोग,महिलाहरुको पाठेघरको समस्या,सेतोपानी बग्ने समस्या,नशा तथा हाड्जोर्नीको समस्या,दाँतका समस्या भएका विरामीको उपचार गरिएको डा.भोजराज अधिकारीले बताउनु भयो । स्वास्थ्य परीक्षणपछि सेवाग्राहीलाई आबस्यकता अनुसार निशुल्क औषधि वितरण साथै गर्भवती महिलाहरुको भिडियो एक्सरे मार्फत स्वास्थ्य परीक्षण गरिएको पुष्पाञ्जली हस्पिटलका व्यवस्थापक सुमन खनालले बताउनुभयो ।
औपचारिक कार्यक्रममा बोल्नुहँुदै पालिकाका प्रमुख प्रशासकीय अधिकृत रामचन्द्र भुषालले यस क्षेत्रका जनताले शहरमा गई भेट्नुपर्ने वरिष्ठ चिकित्सकहरुलाई आफ्नै गाउघरमा सञ्चालित शिविरबाट नै आफ्नो स्वास्थ्य परामर्श तथा सेवा लिन पाउँदा खुसी भएकाले आगामी दिनमा यसैगरि सहकार्य गरी शिविर तथा सचेतना कार्यक्रमलाई निरन्तरता दिने बताउनुभएको थियो । त्यस्तैगरि वरिष्ठ फिजिसियन तथा जनतासंग अस्पतालका परिकल्पनाकार डा.भोजराज अधिकारीले अस्पतालको सामाजिक उत्तरदायित्व र रोग लाग्न नदिन हरेक नागरिकले आफ्नो स्वास्थ्यप्रति चासो र वर्षमा एकदुई पटक स्वास्थ्य जाँच गर्नु आवश्यक रहेको र पुष्पाञ्जली हस्पिटलले बुलिङटारवासीको लागि स्वास्थ्य सेवामा अस्पतालको तर्फवाट २५ प्रतिशत सौलियत प्रदान गर्ने प्रतिवद्धता व्यक्त गर्नुभएको थियो ।
कार्यक्रममा यसै पालिका ३ नं. वडा अध्यक्ष विष्णु विर जर्गामगर,गाउँपालिकाका प्रशासन अधिकृत सिताराम खनाल,लेखा अधिकृत बाबुराम तिवारी जेसी रुपेश क्षेत्री,जेसी ऋषिराम गिरी,जेसी भेषराज झेडी लगायतको उपस्थिति रहेको थियो,भने शिविर कार्यक्रमको स्थानीय संयोजन गंगा फाउण्डेशन,बुलिङटार र बुलिङटार जेसीजले गरेको कार्यक्रम संयोजक रुपेश क्षेत्रीले जानकारी दिनुभयो । गंगा फाउण्डेशनका अध्यक्ष तथा स्वास्थ्य पत्रकार सन्दीपकुमार श्रेष्ठले सामाजिक संस्थामार्फत प्रत्येक वर्ष यसैगरी बुलिङटार आसपासका क्षेत्रमा स्वास्थ्य सचेतना र विशेषज्ञ शिविर सञ्चालन गरीँदै आएको साथै यसलाई थप जिम्मेवार र नागरिकप्रति उत्तरदाई बनी कार्यक्रमलाई निरन्तरता दिने प्रतिवद्धता व्यक्त गर्नुभयो ।
