बागमती श्रेष्ठ
पोखरा । नेशनल हार्ट एण्ड लङ्स सोसाइटीको आयोजनामा नेपालमा पहिलो पटक ‘इन्टरभेन्सन मिट २०२५’ होटल पोखरा ग्राण्डीमा आजबाट सुरु भएको छ ।
सोसाइटीले यस अगाडि तीन वटा अन्तराष्ट्रिय सम्मेलन गरिसकेको र मुटुरोग सम्बन्धी नेपालमा पहिलो पटक ‘इन्टरभेन्सन मिट २०२५’ आज जेष्ठ २४ गते शनिवार होटल पोखरा ग्राण्डीमा हुने सोसाइटीका अध्यक्ष डा.शंकर लौडारीले जानकारी दिनुभएको हो ।
सम्मेलनमा नेपालसहित छिमेकी राष्ट्रका सहभागी चिकित्सकहरुबाट करिब ४२ वटा बैज्ञानिक सोधपत्र प्रस्तुत हुनेछन् ।
डा.लौडारीका अनुसार सम्मेलनमा ५ वटा सेसनमा स्वदेशी तथा विदेशी विशेषज्ञहरुले मुटुरोगको इन्टरभेन्सन उपचार पद्धतिबारे अनुसन्धानमूलक शोधपत्रमाथि आफ्नो कार्यानुभव व्यक्त गर्नुहुने छ,जसले मुटुरोगको क्षेत्रमा भएका नयाँ विकास,चुनौती , पेशागतअनुभव र सम्भावनाको खोजी र प्रयोगका लागि कोशेढुंगा साबित हुनेमा विश्वास व्यक्त गर्नुभयो।
आज हुने सम्मेलनमा विशेषगरि मुटु रोग विशेषज्ञहरुसहित इन्टरनल मेडिसिन,मृगौला रोग , फोक्सो रोग , न्यूरो मेडिसिन, रेडियोलोजी विधा र क्यान्सर रोगलगायतका विशेषज्ञहरुको वैज्ञानिक शोधपत्रमाथि विशेष छलफल हुने सम्मेलन संयोजक तथा मुटुरोग विशेषज्ञ प्रा.डा. नवराज पौडेलले बताउनु भयो।
